Ulttyq «OTAU TV» teleradıohabar taratý jelisi abonentteriniń sany 100 myńǵa jetti
ALMATY. 15 aqpan. QazAqparat - Bir jyl ishinde 6500-di quraǵan abonentterdiń sany 100 myńǵa deıin artyp, eldi mekenderge qyzmettiń taralý deńgeıi 13 paıyzdan 78 paıyzǵa deıin ósti.
Mundaı qarqyndy halyqtyń sońǵy jańalyqtan habardar bolsaq degen talpynysymen túsindirýge bolady. Bul týraly búgin Almatyda «Qazteleradıo» AQ Ulttyq jerseriktik telehabar taratý jelisiniń jumys qorytyndysyna arnalǵan baspasóz máslıhatynda atalmysh mekemeniń Bas tehnıkalyq dırektory Bazarbek Qartjanov málim etti.
Esterińizge sala keteıik, 2011 jyldyń 18 qańtarynda Astanada Elbasy Nursultan Nazarbaevtyń qatysýymen Ulttyq jerseriktik teleradıohabar taratylý jelisi «OTAU TV» degen jańa saýda belgisimen sandyq DVB-S2 MPEG-4 standartynda iske qosyldy. Ol kezde jerseriktik jeli abonentteriniń sany 6500-di quraǵan. Jańa standartqa kóshpes buryn jerseriktik habar taratý qyzmeti «Katelko Plıýs» saýda belgisi arqyly kórsetilip keldi.
«Ulttyq jerseriktik telehabar taratý jelisin engizgenge deıin elimizdegi otbasylardyń jartysynan astamy otandyq nebári 4 telearnany tamashalaýǵa májbúr boldy. Qazaqstandyqtarǵa jańa múmkindik berý - «OTAU TV» jelisiniń basty maqsaty bolǵandyqtan, búginde jeli eń shalǵaı ornalasqan abonentterge otandyq 33 tele jáne 5 radıoarnany sandyq sapada kórip, tamashalaýǵa múmkindik berýde», - dedi B. Qartjanov.
Kommertsııalyq máseleler jónindegi basqarýshy dırektory Evgenıı Galkınniń aıtýynsha, búginde jelide taratylatyn telearnalardyń sany 60-tan 87-ge deıin ulǵaıtylǵan. «Qazirgi ýaqytta jerseriktik teleradıohabar taratý jelisinde 38 arnadan quralǵan otandyq teleradıoarnalardyń tegin paketi qalyptastyryldy. Aryz-shaǵymdardy qabyldaý jáne óńdeýdiń biryńǵaı qyzmeti (Call-Centre), sondaı-aq satylym ortalyqtary men barlyq oblys ortalyqtarynda jáne Astana, Almaty qalalarynda deldaldarmen jumys bir izge qoıyldy. Búginde seriktes -dılerlerimizdiń sany 400-den asty. Al, jelige qosylý quny (jerseriktik qabyldaýysh jabdyq jınaǵy, qurastyrý jáne jónge keltirý jumysy) respýblıka boıynsha ortasha eseppen 60 000 teńgeden 30 000 teńgege deıin tómendetildi. Osy negizgi faktorlardyń arqasynda 100 000 abonenttik mejege jetý múmkin boldy», -dep atap ótti ol.
Shara barysynda «Qazteleradıo» óziniń 100 myńynshy abonentin seriktes-kompanııa LG Electronics usynǵan HD-standarttaǵy SK-teledıdarymen jáne arnalardyń tolyq paketin 3 aı merzimge tegin kórý múmkindigin berý túrindegi baǵaly syılyqtarymen marapattady. Baǵaly syılyq Almaty oblysy, Talǵar aýdany, Qyzyl Qaırat eldi mekeniniń turǵyny Zııada Baıjanovaǵa buıyrdy.
