Ulttyq ortalyq qyzmetkeri múmkindigi shekteýli balalardyń emi úshin aqsha alǵan

ASTANA. QazAqparat – Sybaılas jemqorlyq agenttigi Balalardy ońaltý ulttyq ortalyǵy qyzmetkerleriniń zańsyz aqshalaı syıaqy alý faktilerin tekserdi, dep habarlaıdy QazAqparat.

«Tergeý barasynda Balalardy ońaltý ulttyq ortalyǵy («University Medical Center» korporatıvtik qory) qyzmetkerleriniń biri múmkindigi shekteýli balalardyń ata-analarynan balalardy ońaltý emine kvota bergeni úshin 60-tan 100 myń teńgege deıin aqshalaı qarajat alǵany anyqtaldy. Tergeý nátıjeleri boıynsha birneshe jyl boıy qoldanylyp kelgen alaıaqtyq shema toqtatyldy, ata-analarǵa keltirilgen zalal tolyǵymen óteldi», - delingen Sybaılas jemqorlyq agenttiginiń habarlamasynda.

Sonymen qatar tergeý barysynda balalardy ońaltý emin kórsetý máseleleri boıynsha birqatar problemalar men kemshilikter anyqtaldy. Mysaly, óńirlerde kvotalardyń birkelki bólinbeýi, ata-analardyń senimsizdigi jáne sońǵylarymen túsindirý jumystarynyń jetkiliksizdigi, ashyq jáne jalpyǵa qoljetimdi kezektiliktiń bolmaýy, sondaı-aq elde osyndaı respýblıkalyq ortalyqtardyń jetispeýshiligi bolǵan.