Ulttyq ortalyq ınfektsııa qozdyrǵyshynan qorǵaný jolyn túsindirdi
«Bala kezinde alǵan ekpeler ómir boıyna ınfektsııalarǵa qarsy ımmýnıtettiń negizin qalyptastyrady. Búgingi tańda vaktsınatsııa - zamanaýı medıtsınadaǵy úzdik jetistikterdiń biri. Qazaqstanda vaktsınatsııa júrgizýdiń nátıjesinde tabıǵı sheshek aýrýy tolyǵymen joıylǵany osyǵan dálel, polıomıelıtti joıý boıynsha is-sharalar júrgizilip jatyr, sondaı-aq qyzamyq pen dıfterııa sońǵy ret 2010 jyly tirkelgen, odan keıin Qazaqstanda mundaı aýrýlar áli tirkelmedi», - dedi ortalyq ókili.
1998 jyly mindetti vaktsınatsııalaýdyń qataryna vırýstyq V gepatıtine qarsy ekpe egý engizilgen bolatyn. Mindetti vaktsınatsııalaý engizilgenge deıin jylyna turǵyndar arasyndaǵy syrqattanýdyń shamamen 4 myńǵa jýyq jaǵdaıy eseptelgen, qazirgi ýaqytta tek eresekterdiń arasyndaǵy bul kórsetkish 200 esege deıin tómendedi, al balalar arasynda syrqattaný jaǵdaıy tirkelmeıdi.
Dúnıejúzilik densaýlyq saqtaý uıymy baǵalaýy boıynsha, ımmýndaý jyl saıyn 2-den 3 mıllıonǵa deıin ólim jaǵdaılarynyń aldyn alýǵa múmkindik beredi.
«Biraq, buǵan qaramastan, keıbir turǵyndar jalpy profılaktıkalyq sharalarmen amaldanyp, ózderin jáne balalaryn vaktsınatsııalaý qajettiligine kúmánmen qaraıdy. Qazaqstanda vaktsınatsııamen qamtylýdyń úlken kólemine qaramastan, túrli sebeptermen vaktsınatsııaǵa kelmeıtin halyqtyń bóligi bar, bul ınfektsııalyq aýrýlardyń taralýyna ákelip soǵýy múmkin. Dene shynyqtyrý, sport, durys tamaqtaný jáne t.b. ımmýnıtetti kóteretini anyq, biraq spetsıfıkalyq ınfektsııa qozdyrǵyshynan únemi qorǵaı almaıdy. Mysaly, qyzylsha aýrýynyń qozdyrǵyshymen kezdesken kezde ekpe salynbaǵan adamnyń 95%-y syrqattanýy múmkin», - dedi maman.
Onyń aıtýynsha, keıbir vaktsınalar belgili ýaqyttan keıin nyǵaıtýshy ekpelerdi qajet etetinin aıta ketý kerek, óıtkeni ýaqyt ótken saıyn ımmýnıtet álsireıdi jáne qorǵanys qabileti jetkiliksiz bolady. Mysaly, dıfterııa jáne sirespege qarsy ekpeler 16 jastan bastap ár 10 jyl saıyn alpys jasqa deıin qaıtalanyp salynady. Árbir qaýym múshesi vaktsına sala otyryp, ınfektsııalardan ózin ǵana emes ózgelerdi de qorǵaıtynyn túsinýi qajet. Ata-analar óz balalaryna jaýapty, budan bólek basqa da jaýapkershilikti umytpaýlary qajet - ekpe salynbaǵan bala basqa balalarǵa qaýip tóndirýi múmkin.
Budan buryn habarlanǵandaı, QR Bas memlekettik sanıtarııalyq dárigeri Jandarbek Bekshın Qazaqstanda qyzylshaǵa qarsy vaktsınatsııadan bas tartý osy aýrýǵa shaldyǵýǵa yqtımaldylyqty úsh ese ósiretinin aıtqan bolatyn.