Ulttyq opera úshin zalǵa stýdentterdi kúshtep toltyratynbyz - Arystanbek Muhamedıuly
ASTANA. QazAqparat - QR Mádenıet jáne sport mınıstri Arystanbek Muhamedıuly ulttyq operalarǵa degen suranystyń artyp kele jatqanyn aıtyp berdi, dep habarlaıdy QazAqparat tilshisi.
«Búgingi tańda bizdiń teatrlar kórermenderdiń úlken yqylasyna, nazaryna ıe ekenin aıta alamyn. «Astana Operada» barlyq spektaklderdiń bıletteri eki aı buryn ótip ketedi. Budan buryn ulttyq operalardyń repertýaryn saqtaý úshin shyny kerek, zalǵa stýdentterdi qýyp tyǵatynbyz. Sebebi, eger opera tabysqa ıe bolmasa, ony repertýardan alyp tastaýy kerektigi týraly talap bar», - dedi mınıstr Úkimettiń baspasóz ortalyǵynda ótken brıfıng barysynda.
Mınıstrdiń aıtýynsha, bizde aınaldyrǵan úsh-tórt ulttyq opera bar.
«Olardy repertýardan alyp tastasaq jaramaıdy ǵoı. Sol úshin biz amaldyń joqtyǵynan stýdentterdi, aǵaıyn-týystardy aparyp «Minekeı, kórermen keldi» dep otyrǵyzyp qoıatynbyz. Al qazirgi tańda eń birinshi kezekte ulttyq operalardyń bıletteri ótip jatyr. Abaı operasy, Birjan Sara, Qyz-Jibek operasyna kelýshiler jeterlik. Qyzyqty bolǵannan keıin halyq operaǵa keledi. Al eger de joǵary deńgeıde bolmasa, qazirgi ýaqytta kórermendi teatrǵa kúshtep apara almaısyń», - dedi Arystanbek Muhamedıuly.
