Ulttyq ónerimizdi ulyqtaıtyn jańa telejobanyń túsirilimi bastaldy
ASTANA. QazAqparat - «Qazaqstan» telearnasy dástúrli án-kúılerimizdi nasıhattaıtyn jańa ulttyq jobany - «Іnjý-marjan» telebaǵdarlamasyn qolǵa aldy. Búgin «Qazmedıa» ortalyǵynda jobanyń alǵashqy túsirilimi bastaldy. Onyń mańyzy men maqsaty týraly Teleradıokorporatsııanyń tóraǵasy Erlan Qarın aıtyp berdi, dep habarlaıdy QazAqparat tilshisi.
Atap ótilgendeı, jańa televızııalyq jobanyń maqsaty - tól ónerimiz - dástúrli án, jyr-termeler men kúılerdi nasıhattaý, ony bolashaq urpaqqa rýhanı-mádenı mura retinde saqtaý, ulttyq ónerdi dáripteý.
Búgin «Qazmedıa» ortalyǵynda bastalǵan alǵashqy túsirilim jumysyna ulttyq mýzykaǵa eńbek sińirip júrgen belgili tulǵalar Seken Turysbekov pen Sáýle Janpeıisova qatysty. Aldaǵy ýaqytta jobaǵa Qajybek Bekbosynov, Bilál Ysqaqov, Ramazan Stamǵazıev syndy ózge de dástúrli ánshiler men kúıshiler shaqyrylyp, olar qalyń kórermenge ónerlerin tartý etpek.
Aıta keteıik, «Іnjý-marjan» telebaǵdarlamasyna tanymal tulǵalar ǵana emes, dástúrli mýzykany janyna serik etken Qazaqstannyń túkpir-túkpirindegi azamattar qatysatyn bolady.
Joba qansha ýaqyt túsiriletini jáne onyń kórermenge qashan jol tartatyny ázirge belgisiz.
«Ulttyq ónerdi dáripteıtin kóptegen televızııalyq jobalar bar, sonyń biri ótken jyly bastalǵan «Men qazaqpyn» jobasy. Al búgingi jobanyń jóni bólek, biz buǵan uzaq daıyndaldyq. Elimizdegi dástúrli ánshiler, jyrshy-termeshiler men kúıshilerdiń basyn Ulttyq arnada toǵystyrýdamyz. Baǵdarlamaǵa elimizdiń barlyq óńirinen dástúrli ónerdi aıtyp qana qoımaı, ony búgingi urpaqqa tutastaı jetkizýshi ónerpazdardy shaqyrdyq. Qazir alǵashqy túsirilim jumystary bastaldy. Kórermenge qashan jol tartatyny keıin belgili bolady», - dedi «Qazaqstan» teleradıokorporatsııasynyń tóraǵasy Erlan Qarın.
Onyń aıtýynsha, atalǵan jobany qolǵa alýdaǵy taǵy bir maqsat - ulttyq arnada dástúrli shyǵarmalardyń arhıvtik vıdeoqoryn jınaqtaý.
Uıymdastyrýshylardyń sózine qaraǵanda, «Іnjý-marjan» ulttyq jobasy kórermenderdiń estetıkalyq talǵamy men dúnıetanymynyń damýyna óz úlesin qospaq.
