Ulttyq Olımpıada komıteti boksshylardyń Tokıoda kórsetken ónerine baǵa berdi
«Bokstan ulttyq qurama komanda Rıo oıyndarynyń aldynda AQSh-ta daıyndalyp, Vasılıı Levıt pen Danııar Eleýsinov sııaqty úzdikter arnaıy baǵdarlama boıynsha jattyqqan edi. Bul baǵdarlamaǵa tipti bıýdjetten tys qarajat bólingen bolatyn. Boksshylar arasynda sońǵy bir jylda eshbir jarystyń bolmaýy olımpıada tsıkline daıyndyqty nasharlatty. Tokıo Olımpıadasynyń nátıjesi ulttyq birinshilikterinde báseke óte joǵary iri elder ǵana jarys tájirıbesin ishki jaǵdaıda qamtamasyz ete alǵanyn kórsetti», - dedi Andreı Krıýkov.
Onyń aıtýyna qaraǵanda, ishki chempıonattyń deńgeıi AQSh sportshylaryna - jeńil atletıkada, boks pen gımnastıka salasynda, Japonııa sportshylaryna - dzıýdoda, Ońtústik Koreıa sportshylaryna - sadaq atý men semserlesýde tabysty óner kórsetýge múmkindik bergen.
«Bizge Azııa elderiniń pandemııa kezinde bir-birinen oqshaý qalǵany da keri áserin tıgizdi. Al Eýropa elderinde ózara qatynaý múmkindigi boldy. Osylaısha sportshylar kúntizbesin ózgerissiz qaldyryp, jarys praktıkasyn qajetti mólsherde ala bildi. Taldaý júrgize kelip, sarapshylar jarys praktıkasynyń bolmaýynan bólek, ulttyq qurama músheleriniń moraldyq-psıhologııalyq daıyndyǵy álsiz bolǵanyn aıtty. Ásirese jeke sport túrlerinde solaı bolǵan. Daıyndyq jattyǵýlarynyń jabyq jaǵdaıda ótýi jalǵyz daıyndalatyn sportshylardyń psıhologııalyq kóńil-kúıine áser etken. Bapkerlerdiń qatelesken tusy da boldy. Biraq oǵan kóp jaǵdaıda pandemııa shekteýinen jol tabý áreketteri sebepker bolǵan», - dedi komıtettiń bas hatshysy.
