Ulttyq neırohırýrgııa ortalyǵy Parkınsonge shaldyqqan 300-den asa patsıentke ota jasady
«Dúnıejúzilik densaýlyq saqtaý uıymynyń (DDSU) bastamasymen jyl saıyn 11 sáýirde Parkınson aýrýymen dúnıejúzilik kúres kúni (World Parkinson's Day) atalyp ótiledi. Osy ataýly kún aıasynda «Ulttyq neırohırýrgııa ortalyǵy» AQ 2019 jylǵy 10-11 sáýir aralyǵynda Parkınsonmen aýyratyn jáne qımyl-qozǵalysy buzylǵan patsıentterge nevrologtar tegin konsýltatsııa ótkizedi. Kelýshilerdi qımyl-qozǵalysy buzylǵan naýqastardy, Parkınson aýrýyn jáne basqa da degeneratıvti dertti dıagnostıkalap, emdeıtin mamandar qabyldaıdy», delingen habarlamada.
Statıstıkaǵa súıensek, búgingi kúni Qazaqstanda Parkınson aýrýynan zardap shegetinder sany 20 myńnan asady, qazirgi tańda bul naýqastardyń ómir súrý sapasyn aıtarlyqtaı joǵarylatýǵa múmkindik berilgen.
«2013 jyldan bastap «Ulttyq neırohırýrgııa ortalyǵy» AQ atalǵan patologııany emdeýdiń neırohırýrgııalyq ádisterin - mıdy tereń neırostımýlıatsııalaý jáne pallıdotomııa men talamotomııa sııaqty ablıatıvtik aralasýlar júrgizý ádisin engizdi jáne sátti qoldanýda. Búgingi kúnge deıin Ulttyq neırohırýrgııa ortalyǵynda Parkınson aýrýy boıynsha shamamen 300-den asa hırýrgııalyq operatsııa sátti jasaldy», delingen habarlamada.
Atalǵan joǵary tehnologııalyq operatsııalar Qazaqstanda tegin memleket qarajaty esebinen júrgiziledi.
2014 jyly Ulttyq neırohırýrgııa ortalyǵynda patsıent Baqytgúl Taýkenqyzynyń mıyn tereń stımýlıatsııalaý boıynsha operatsııa jasaldy. Osymen besinshi jyl osy áıel kólemi uıaly telefon sııaqty kishkentaı qurylǵymen ómir súrip keledi, atalǵan qurylǵy patsıenttiń ózin qalaı sezinýine baılanysty bir baǵdarlamadan ekinshi baǵdarlamaǵa aýystyrýǵa múmkindik beredi. Áıeldiń aıtýy boıynsha qurylǵy onyń ómir súrý sapasyn jaqsartqan jáne onyń qımyl-qozǵalysynyń úılesimin baqylap otyrýǵa, ózgeniń kómeginsiz ózdiginen júrip-turýǵa múmkindik beredi.
Búgin osy áıel Ulttyq neırohırýrgııa ortalyǵyna atalǵan qurylǵynyń batereıasyn aýystyrýǵa keldi.