«Ulttyq mýzeıge syı tartý» aktsııasy bastaldy (FOTO)
ASTANA. QazAqparat - El arasynda eleýsiz jatqan tarıhı mańyzy zor qundy zattardy, ultymyzdyń uly tulǵalarynyń jádigerlerin kásibı turǵyda saqtaý jáne kópshilik nazaryna usyný úshin 18 naýryz kúni «Ulttyq mýzeıge syı tartý» aktsııasy bastaldy.
Shara barysynda QR Premer-mınıstriniń orynbasary Berdibek Saparbaev sóz sóılep, ulttyq tarıhı-mádenı muramyzdy saqtaý máselesine qoǵam nazaryn aýdarýdyń mańyzdylyǵyna toqtaldy, dep habarlaıdy «Qazaqstan tarıhy» portaly.
Al atalmysh mýzeı dırektory Darhan Myńbaı «Ulttyq mýzeıge syı tartý» aktsııasyna qatysýshy óziniń kollektsııasyndaǵy qundy jádigerdi, el tarıhyna qatysty eleýli murany nemese elge belgili tulǵanyń qoldanǵan zattaryn mýzeıge saqtaýǵa tabystaı alatynyn atap ótti. Barlyq jańa jádigerlerge zańdyq negizde qabyldap alý sharty jasalyp, olar mýzeıdiń qoryna ótkiziletin bolady. Aktsııa B.Ázirbaevtan K.Ázirbaevtyń dombyralaryn, syldyrmaǵy men jelpýishin, kemer beldigi men taspıyǵyn, qarakól bórigi men jaınamazyn, Quran kitaby men shapanyn jáne súıenish taıaǵyn qabyldaýmen bastaldy. Olımpıada chempıondary O.Shıshıgına jeńil jeńsiz jeıdesin, S.Sápıev altyn medaldaryn, jeńsiz maıkasy men qoltańbasy qoıylǵan boks qolǵabyn, V.Smırnov sporttyq buıymdaryn syıǵa tartty. «Qadyr Myrza Áli» qorynyń dırektory D.Qajymov Q.Myrzalıevtyń jeke zattary men marapat qujattaryn tapsyrdy. Aqyn J. Nájimedenovtyń, sportshy J.Úshkempirovtyń, memleket qaıratkeri J.Táshenovtyń, kompozıtor Sh.Qaldaıaqovtyń, Keńes Odaǵynyń batyry Q.Qaısenovtyń jeke zattary da mýzeıge syıǵa berildi. Sýretshi G.Ismaılovanyń uly V.Sıdorkın anasynyń qylqalamdary men avtolıtografııasyn jáne jeke buıymdaryn tapsyrdy. Sýretshi A.Qazyǵulovtyń jumystary, Uly Otan soǵysy ardageri, panfılovshy A.Meńdiǵalıevtyń músini, Mekkege jaıaý barǵan Iman qajynyń sapary kezinde ustaǵan Qazaqstan Týy, H.Abaevtyń oryndaýyndaǵy Muhtar Áýezovtyń portreti, QR Ádilet mınıstriniń orynbasary B.Ábdiraıym usynǵan aq metaldan jasalǵan bıdiń tós belgisi, memleket jáne qoǵam qaıratkeri, saıasattanýshy ǵalym E.Qarınniń jeke jınaǵyndaǵy jebe ushtary Ulttyq mýzeı qoryn tolyqtyra tústi. Syı-tartýlar negizinde arnaıy kórme uıymdastyryldy. «Ulttyq mýzeıge syı tartý» aktsııasy jyl boıy júrgizilip, bıylǵy jeltoqsan aıynda qorytyndylanatyn bolady.
