Ulttyq mýzeıge Bolǵan ananyń jańǵyrtylǵan beınesi qoıyldy
«Búgingi kórme erekshe. Sebebi qasıetti Saryarqa tórinen qundy jádigerler ákelindi. Bolǵan ananyń jańǵyrtylǵan keıpi bizdiń mýzeıde. Ózderińiz biletindeı, Memleket basshysy Altyn Ordanyń 750 jyldyq mereıtoıyn memlekettik deńgeıde atap ótýdi bekitti. Búgingi kórme sol sharanyń aıasynda iske asyp otyr. Bolǵan ana degende bizdiń oıymyzǵa aldymen Shyńǵys han keledi. Tarıhtan Shyńǵys han urpaqtarynyń Ulytaýdy mekendegenin bilemiz. Búgingi kórmeni uıymdastyrýda úles qosqan ár azamatqa alǵysymdy bildiremin», - dedi QR Ulttyq mýzeıiniń dırektory Arystanbek Muhamedıuly kórmeniń ashylýynda.
Kórmege altyn tostaǵan, syrǵa, er-toqym, aına, kezdik, jibekten tigilgen shapan jáne taǵy basqa qundy zattar qoıylǵan. Jáne basty jádiger - Bolǵan ananyń jańǵyrtylǵan beınesi.
Kórmeni uıymdastyrýshylarynyń aıtýynsha, Bolǵan ana kesenesinde arheologııalyq qazba jumysy 2018 jyly bastalǵan.
«Memleket basshysy Ulytaýdyń tarıhy men taǵlymyn urpaq tárbıesi men otanshyldyq jáne ishki týrızmdi damyta túsýde oń paıdalaný kerektigin aıtqan edi. Búgin biz Qaraǵandy oblysy, Ulytaý aýdanyndaǵy Bolǵan ana kesenesinen tabylǵan jádigerlerdi kópshilik nazaryna usynyp otyrmyz. Sondaı-aq, Bolǵan ana beınesiniń jańǵyrtylǵan nusqasyn da ákelip otyrmyz. Bizdiń maqsat – Altyn Orda dáýiriniń tarıhyn keńinen nasıhattaý. Jáne arheologııalyq qazba kezinde tabylǵan jádigerlerdi jurtshylyq nazaryna usyný», - dedi Qaraǵandy oblystyq mádenıet, arhıvter jáne qujattama basqarmasynyń basshysy Erkebulan Jumakenov.
Aıtýly sharaǵa zııaly qaýym ókilderi, qoǵam qaıratkerleri, arhıv, kitaphana, mýzeı qyzmetkerleri men stýdentter qatysty.
