Ulttyq mýzeıdegi altyn buıymdar men qazaqtyń zergerlik zattary katalog bolyp shyǵaryldy
ASTANA. QazAqparat - Búgin QR Ulttyq mýzeıinde «Halyq qazynasy» ǵylymı-zertteý ınstıtýtynyń «Qazyna» serııasy aıasynda basylyp shyǵarylǵan «Ǵasyrlar altyny. Ulttyq mýzeıdiń altyn jáne kúmis buıymdarynyń toptamasy» jáne «Ulttyq mýzeı toptamasyndaǵy qazaqtyń zergerlik óneri» atty ıllıýstratsııaly katalogtarynyń tusaýkeseri ótti.
«Eki birdeı katalog albomynyń tusaýkeseri bolyp jatyr. Bul eki kitap bizdiń «Qazyna» serııamyzben shyǵyp jatyr. Osy mýzeıde jınalǵan altyn men kúmisterdiń barlyǵyn jınaqtap, ony ǵylymı aınalymǵa túsirý úshin júıelep, katalogtar jaryqqa shyǵaryldy», - dedi QR Ulttyq mýzeıiniń dırektory Darhan Myńbaı.
Osy rette ol elimizdiń aýmaǵynda kóptegen qundy jádigerler tabylǵanyn aıta kele: «Bul zattar tek óner men órnek qana emes, sol kezdegi bizdiń ata-babalarymyzdyń dúnıetanymyn kórsetetin aıǵaqty belgiler. Biz osy jádigerlerge qurmetpen qaraımyz jáne olardyń árqaısysy áli de zertteýdi qajet etedi. Sondyqtan atalǵan katalogtardyń shyǵýyna eńbegin qosqan barsha azamattarǵa alǵsymdy aıtamyn»,-dedi.
Serııalyq basylymdy daıyndaý men basyp shyǵarýdaǵy negizgi maqsat - Qazaqstannyń ejelgi jáne ortaǵasyrlar tarıhy men mádenıetine qatysty tyń materıaldardy jınaqtaý, ǵylymı taldaý jáne tolyqqandy derek retinde basyp shyǵarý, ǵylymı aınalymǵa engizý.
Kóne zamannyń teńdessiz jaýharlary QR Ulttyq mýzeıiniń ekspozıtsııasynda mańyzdy oryn alady.
Altyn men kúmisten jasalǵan buıymdar toptastyrylǵan bul katalog qola dáýirinen ortaǵasyrlarǵa deıingi jádigerlermen tanysýǵa múmkindik beredi.
«Kóne muralardyń izi qazaq halqynyń dástúrli zergerlik ónerinen de anyq baıqalady. Eger qola dáýirinen ortaǵasyrlarǵa deıingi ýaqytty altyn túsimen kóbirek baılanystyrsaq, keıin kele bul tanym kúmiske aýysady. Zergerlik óner buıymdary toptastyrylǵan ekinshi katalogta dástúrli qazaq qoǵamyndaǵy balalarǵa, erler men áıelderge arnalǵan buıymdar jan-jaqty sıpattalady. Kópshilik zattar qazaq qoǵamynda orny erekshe, áýlettiń, otbasynyń uıytqysy sanalatyn áıelderge tıesili»,-dep atap ótilgen mýzeı habarlamasynda.
