Ulttyq mýzeıde Táýelsizdik kúnine oraı qos kitaptyń tusaýy kesildi (FOTO)

ASTANA. QazAqparat - Búgin Astanadaǵy QR Ulttyq mýzeıinde Qazaqstan Respýblıkasynyń Táýelsizdik kúnine arnalǵan saltanatty jıyn ótti. Shara sheńberinde «Ult muraty» ı «Vozrojdennye sokrovışa Kazahstana» atty qos kitaptyń tusaýy kesiledi.

Saltanatty jıyn negizinen tarıhı kezeńderdi qamtı otyryp, Qazaqstannyń barlyq jetistikteri men tabystaryn kórsetý arqyly azamattyq patrıotızmdi nyǵaıtýdy maqsat tutady. Al «Ult muraty» jınaǵyn QR Ulttyq mýzeıiniń dırektory Darhan Myńbaı men «Mádenı mura» jýrnalynyń bas redaktory Jarylqap Beısenbaıuly qurastyrdy. Ulttyq mýzeı tarapynan daıyndalǵan jınaqta Elbasynyń 2014 jylǵy 17 qańtarda Qazaqstan halqyna arnaǵan «Qazaqstan joly - 2050: Bir maqsat, bir múdde, bir bolashaq» Joldaýyndaǵy «Máńgilik el» ıdeıasyn - Qazaq eliniń Ulttyq ıdeıasy etip usynýyna oraılastyrylǵan maqalalar toptastyrylyp otyr. Belgili ǵalymdar jazǵan eńbekterde arǵy túbi botaı, beǵazy-dándibaı dáýirlerinen bastalyp, saq, ǵun órkenıetterine ulasqan, odan Kók túrkterge, Altyn Orda, Qazaq handyǵyna jalǵasqan eldik, memlekettik tarıhymyz jan-jaqty sóz bolady. Ári babalarymyz qurǵan baıyrǵy patshalyqtar, qaǵanattar men ulystarǵa qatysty aıǵaqty mysaldar Ulttyq mýzeıdegi qundy jádigerlikterdiń jarqyn dáıekteri arqyly zerdelenedi. Al «Vozrojdennye sokrovışa Kazahstana» kitabynda ult qazynasyn saqtaýdyń keshendi máseleleri qamtylǵan. Munda kórsetilgen qazynalardyń basym bóligi «Mádenı mura» ulttyq baǵdarlamasy aıasynda jańǵyrtylyp otyr. Qos kitap qalyń aýdıtorııaǵa, qalpyna keltirýshiler men arheologtarǵa, mýzeı qyzmetkerlerine, tarıhshylarǵa, shyǵystanýshylarǵa jáne stýdentterge arnalǵan. Kitaptyń avtory Qazaqstan Sýretshiler odaǵynyń múshesi, «Altyn adamdy», «Berel» qorǵanynan tabylǵan attardy jáne taǵy da basqa jádigerlerdi jańǵyrtýshy Qyrym Altynbekov.