Ulttyq mýzeıde Shyǵystyń Altyn ǵasyrymen baılanysty kórme ashyldy

Kórmege Reseı etnografııalyq mýzeıiniń (Sankt-Peterbor) etnografııalyq eskertkishteriniń toptamasy qoıylǵan.

Kórmeniń ataýy kerýen shól daladaǵy joldarmen asyl zattardy, jibek matalardy, olardan tigilgen keremet kıimder men dámdeýishter jáne esepsiz qazynalardy tasymaldaǵan Shyǵystyń Altyn ǵasyrymen baılanysty. Erteden-aq, Úndistan men Qytaıdan shyǵyp Jer Orta teńizi men Volga boıyna bet alǵan saýda kerýenderiniń toǵysatyn jeri bolǵan Qazaqstannyń keń baıtaq jeri Batys pen Shyǵys arasyndaǵy mádenı dıalogtiń, bir-birine janaspaıtyn dinı, fılosofııalyq, etnıkalyq oılardyń, tehnologııalardyń jáne Eýroazııadaǵy ártúrli halyqtardyń kórkem shyǵarmalarynda shyndyqty beıneleýdiń úlgileriniń jınaqtalatyn orny bolǵan.

Kórmege 400-den astam jádiger qoıylǵan: qural-saımandar men stanoktar, kıim-keshekter, úı buıymdary, minis jáne júk artatyn maldardyń jabdyqtary, mata úlgileri, kilemder men kesteler, úılený toıyna qatysty zattar, ıslam dinine qatysty buıymdar jáne t.b. Ekspozıtsııa Ortalyq Azııa men Kavkaz halyqtarynyń dástúrli mádenıetindegi toqyma óneriniń ornyn jáne qoldaný aıasyn sıpattaıdy.

Toqyma óndirisiniń tehnologııasy men onyń turmysta qoldanýy ǵana emes, sonymen qatar sol zamandaǵy tarıhı máseleler men qoǵamdyq qarym-qatynastardy keńinen sıpattaıtyn Kórmemen attas katalog shyǵaryldy.

2014 jyldyń 3 shildesinde Qazaqstan Respýblıkasynyń Ulttyq mýzeıi men Reseı etnografııalyq mýzeıi basshylary áriptestik týraly memorandýmǵa qol qoıǵanyn eske salamyz. «Ortalyq Azııa men Kavkazdaǵy dástúrli toqyma óneri - Uly Jibek jolynyń murasy» atty kórme - Qazaqstan men Reseıdiń eki iri mýzeıiniń arasyndaǵy alǵashqy birlesken joba.

Kórme Ulttyq mýzeıdiń 1-qabatyna ornalasqan, 2014 jyldyń 1 qyrkúıegine deıin sozylady.