Ulttyq mýzeıde Saq taıpasynyń altyn buıymdary tanystyryldy
ASTANA. QazAqparat - QR Ulttyq mýzeıinde «Saq altyny» túpnusqa artefaktilerdiń halyqaralyq kórmesi ashyldy, dep habarlaıdy «QazAqparat» HAA tilshisi.
Kórmege b.z.d. VII-II ǵǵ. Saq mádenıetine tıesili QR Ulttyq mýzeıi, Orynbor gýbernatorlyq tarıhı-ólketaný murajaıynyń jınaqtarynyń jáne ataqty qazaqstandyq restavrator Qyrym Altynbekovtyń kollektsııalarynyń úzdik artefaktileri usynylyp otyr. Atap aıtqanda, Berel, Shilikti, Taqsaı, Arjan qorǵandarynan tabylǵan túpnusqa altyn buıymdar jáne 2013 jyly Orynbordan tabylǵan Sarmat hanshaıymynyń restavratsııalanǵan nusqasy qoıylǵan.
Saltanatty shara QR Mádenıet jáne sport mınıstri Arystanbek Muhamedıulynyń quttyqtaý sózimen ashyldy.
«Búgingi sharany EKSPO-2017 kórmesi aıasynda ótkizip otyrǵanymyz úshin qýanyshtymyn, sebebi birlesken kórme ótkizýdi jyldar boıy armandap keldik. Ózderińizge málim, saq jádigerleriniń eń qundy oljasy - Ulttyq mýzeıimizde turǵan «Altyn adam». Bul qadamdarymyz kórermenderge ǵana emes, ǵylymǵa da orasan zor paıdasyn tıgizerine senimdimin», - dedi ol.
Sondaı-aq, kórme kýratory, sýretshi-restavrator Qyrym Altynbekov tabylǵan jádigerlerdi restavratsııalaý barysynda jyldamdyq pen uqyptylyqty qatar ustanýdyń mańyzdy ekenin aıtty.
«Bizdiń zerthana arheologııalyq oljalar men mýzeıdiń qundy buıymdaryn konservatsııalaýmen jáne restavratsııalaýmen aınalysady. Bul iste bizge árbir sekýnd qymbat, bizdiń tarıhymyz ben mádenıetimizdi aıǵaqtaıtyn eksponattyń taǵdyryn sol sekýnd sheshedi. Ótken jyly mýzeıge myńdaǵan artefaktiler tapsyrdyq. Onyń kópshiligi tez joǵalatyn organıkadan quralǵan», - dedi ǵalym.
Aıta keteıik, atalǵan shara EKSPO-2017 kórmesi aıasynda uıymdastyrylyp otyr. «Saq altyny» buıymdaryna deıin QR Ulttyq mýzeıinde «Tsın Shıhýandı ımperatordyń Terrakota áskeri»,«Shambalany izdeý jolynda: Nıkolaı Rerıhtyń Nıý-Iork mýzeıindegi jaýharlary» jáne ózge de ekspozıtsııalar uıymdastyryldy.
