Ulttyq mýzeıde Raýshan Orazbaevanyń «Qobyz saryny» atty lektsııa-kontserti ótti
ASTANA. QazAqparat - 2016 jyldyń 22 qarashasy kúni Qazaqstan Respýblıkasy Ulttyq mýzeıinde qobyzshy Raýshan Orazbaevanyń «Qobyz saryny» atty lektsııa-kontserti ótti, dep habarlaıdy QazAqparat Ulttyq mýzeıdiń aqparattyq-ımıdjdik jumystar qyzmetiniń baspasóz málimetterine silteme jasap.
Kontserttiń maqsaty - búginge deıin qaımaǵy buzylmaı jetken qazaqtyń qobyzshylyq ónerin, onyń ókilderi men shyǵarmalaryn qalyń kópshilikke keńinen nasıhattaý.
Shara barysynda qonaqtar qobyzshy, Qazaqstan Respýblıkasynyń «Mádenıet qaıratkeri», Qazaq Ulttyq óner ýnıversıtetiniń aǵa oqytýshysy Raýshan Orazbaevanyń dárisin tyńdap, Astana qalalyq № 1 mýzyka mektebiniń «Qobyz-Rýh» ansambliniń ónerin tamashalady.
Raýshan Orazbaeva álemniń kóptegen elderine baryp, kóneden kele jatqan dástúrli aspabymyz - qobyzdy nasıhattap júr.
Onyń aıtýynsha, sheteldikter qobyzdyń tarıhy men qońyr únine erekshe qyzyǵýshylyq tanytatyn kórinedi.
«Qobyz áýenderindegi saryn kóne zamannan búginge deıin óziniń ózegin saqtap kelgen. Sáıkesinshe, ár kúıde negizgi saryn bolady. Mine osy negizgi saryn esh ýaqytta ózgermeıdi. Al osy negizgi sarynnyń aınalasynda ár oryndaýshynyń óz janynan qosyp, árlep, damytýy nátıjesinde kobyz kúıleri túrlenip otyrady, - deıdi Raýshan Orazbaeva.
Atalǵan shara «Halyq qazynasy» ǵylymı-zertteý ınstıtýtynyń «Dástúrli mýzykalyq mura» atty mýzeılik baǵdarlamasy aıasynda uıymdastyryldy.
