Ulttyq mýzeıde «National Geographic-tiń» úzdik 50 sýreti» atty kórme ashyldy (FOTO)
ASTANA. QazAqparat - Astanadaǵy Ulttyq mýzeıde «National Geographic-tiń» úzdik 50 sýreti» atty fotokórme óz jumysyn bastady. Kórme Ortalyq Azııa óńirinde tuńǵysh ret jaryq kórgen «National Geographic Qazaqstan» jýrnalynyń tusaýkeseri aıasynda uıymdastyrylyp otyr.
Sharaǵa «National Geographic» halyqaralyq jýrnalynyń Vashıngtonnan kelgen basshylyǵy, sheteldik meımandar, QR Parlamentiniń depýtattary, elimizdegi dıplomatııalyq korpýs ókilderi, ǵalymdar men zııaly qaýym, bıznes-qaýymdastyq músheleri, memlekettik organ qyzmetkerleri jáne t.b. qatysty. Jýrnaldyń tusaýkeser rásimine arnalǵan baspasóz máslıhatyn QR Aqparat jáne kommýnıkatsııa mınıstri Dáýren Abaev quttyqtaý sóz sóılep ashty.
«National Geographic» halyqaralyq jýrnalynyń jaýapty redaktorlarynyń biri, basylym dırektorynyń orynbasary Darren Smıt Qazaqstan týraly muraǵattan alynǵan maqalalarǵa toqtalsa, jýrnaldyń marketıng dırektory Arıel Lor áıgili brendtiń tarıhyna sholý jasady. Sondaı-aq, «National Geographic Qazaqstan» jýrnalynyń bas redaktory Erkin Jaqypov jergilikti redaktsııanyń ustanǵan baǵyty men aldaǵy josparlary týraly aıtyp ótti.
Aıta keterlik erekshe jaıt, sharaǵa búginde jasy 80-nen asqan Fazıla Janaltaı áje qurmetti qonaq retinde shaqyryldy. Ol kisiniń sýreti «National Geographic» jýrnalynyń 1954 jyly shyqqan sanynda jarııalanǵan eken. Qytaıdaǵy bosqyn qazaqtar týraly maqalada soltústik Altaıdan bastap, Túrkııaǵa taban tiregen jurttyń aıanyshty ómiri baıandalǵan. Taǵdyrdyń taýqymetin tartyp, tarıhtyń tiri kýágerine aınalǵan qart ájeı, búginde tarydaı shashylǵan sol kóshtiń kózi tiri, sanaýly ókiliniń biri sanalady. Atamekenine oralǵan keıýana qazir Astana qalasynda turady.
Ulttyq mýzeıde eki aıǵa jalǵasatyn «National Geographic-tiń» úzdik 50 sýreti» atty fotokórmede 128 jyldyq tarıhy bar bedeldi basylymnyń álemdi ózgertken eń úzdik fotolary usynylǵan. Onda Stıv Makkarrıdyń dúnıeni sharlaǵan áıgili «Aýǵan qyzy» sýretinen bastap, Djeın Gýdolldyń tańǵajaıyp kadrlary, Tomas Aberkrombıdiń 1965 jyly túsirilgen Mekke kórinisi jáne «National Geographic» tarıhyndaǵy basqa da tanymal fototýyndylar pash etildi. Sondaı-aq, kelýshiler 10 000 vattyq jaryqpen 4 022 metr tereńdikte Emorı Krıstof «tiriltken» Tıtanıktiń sýretine tánti bolyp, keremet áserge bólendi.
Aıta keteıik, «National Geographic» - álemdegi eń bedeldi qoǵamdyq ujymdardyń biri. Negizi HІH ǵasyrda qalanǵan brendtiń menshigine birqatar telearnalar, jýrnaldar, baspa úıleri kiredi. «National Geographic-tiń» búginde álem boıynsha 600 mıllıon aýdıtorııasy bar. 128 jylda qoǵam ǵylymı-zertteý jumystaryna 11 000 grant bóldi. Basylym betindegi maqalalar shynaıy ári túbegeıli ǵylymı zertteýlerge negizdelgen. Basylym álemniń 38 tilinde, 80-nen astam elge taraıdy jáne ǵalamshardy aıalaýdy nasıhattap, ony qorǵaýǵa úndeıdi, Jer sharynyń qaıtalanbas tabıǵatynyń ádemiligin saqtaýǵa shaqyrady.
