Ulttyq mýzeıde músinshi Erkin Mergenovtyń kórmesi ashyldy
ASTANA. QazAqparat - Qazaqstan Respýblıkasynyń Ulttyq mýzeıinde músinshi Erkin Mergenovtyń «Erkin Mergenov. Ýaqytty seziný» atty kórmesi ashyldy, dep habarlaıdy QazAqparat tilshisi.
Kórmeniń ashylýyna «Erkindik» qory men Ulttyq mýzeı muryndyq bolyp otyr. Qazaqstannyń Halyq sýretshisi Erkin Mergenov 2015 jyly ómirden ótip ketkenimen, eline óshpes mura qaldyrǵan biregeı músinshi. Erkin Mergenovtyń kórmesi arqyly Ulttyq mýzeı Qazaqstannyń sýretshilik ónerine erekshe úles qosqan tulǵalardyń shyǵarmashylyǵyn kópshilikke túsindirip, taratýǵa baǵyttalǵan «Qazaqstan zamanaýı óner tarıhyndaǵy tulǵalar» atty jobasyn jalǵastyrmaq.
«Erkin Tilekulynyń aramyzdan ketkenine 3 jylǵa taıap qaldy. Eń birinshi kezekte músinshi, sýretshi, azamat, adam retinde eshqashan shyndyqqa kelgende buǵyp qalǵan emes. Bizdiń bárimiz osy ómirdiń boıaýly kelbetine úırenip qalǵanbyz. Al onyń shyǵarmashylyǵyna kelgende adam ómirdiń shynaıylyǵyn túsinýdiń kúrdeli qatparlarymen betpe-bet keledi. Shyndyq pen ótiriktiń kúresi Erkin Mergenovtyń týyndylarynda aıqyn kórinedi. Shyndyqty kóp adam qabyldamaıdy. Biraq, odan qutylǵan eshkim joq. Osy kórmeden kórermender músinshi árdaıym jetkizgisi kelgen shyndyqty tabar degen úmittemin», - dedi kórmeniń búgingi ashylýynda ónertanýshy Kamılla Lı.
Ónertanýshynyń aıtýynsha, ómirden óter aldynda Erkin Mergenovtyń Máskeýdegi Sýretshilerdiń ortalyq úıinde jáne Almatydaǵy Á.Qasteev atyndaǵy QR Memlekettik óner mýzeıinde eki kórmesi ótken. Kúnderiniń sanaýly qalǵanyn sezgendeı, sýretshi ol kórmelerdiń ekeýin de «Qoshtasý» dep atap ketipti. Astanadaǵy «Erkin Mergenov. Ýaqytty seziný» kórmesiniń ótýine sýretshiniń murageri ári shákirti Álibek Mergenov muryndyq bolǵanyn da aıta ketý kerek.
Erkin Mergenovtyń shyǵarmashylyǵy - Ortalyq Azııanyń óner keńistigindegi biregeı qubylys. Onyń músinderi jahandyq tarıhı ózgerister dáýiriniń kórkem sımvoldary sanalady. Ol ulttyq kórkem dástúrdiń estetıkalyq jáne kórkem qaǵıdalaryn zerdeleı kele olardyń tyń rakýrstaryn, názik te maǵynaly ıdeıalaryn ashady. Mergenov qazaqy oıýdyń saryndarynan músin kóleminiń názik beıneliligin birinshi bolyp kóre bilgen tulǵa.
Músinshiniń týyndylary QR Ulttyq mýzeıiniń, Á.Qasteev atyndaǵy QR Memlekettik óner mýzeıiniń, Memlekettik Tretıakov galereıasynyń, Ýkraınadaǵy Orys óneri Memlekettik mýzeıiniń, Qyrǵyz Memlekettik óner mýzeıiniń toptamalarynda, sol sekildi alys jáne jaqyn shetelderdiń jeke kollektsııalarynda saqtaýly.
Kórme osy jyldyń 23 shildesine deıin jalǵasady.
