Ulttyq mýzeıde koreı sýretshisiniń «Kúlimdegen álem» atty kórmesi ashyldy
ASTANA. QazAqparat - Búgin Ulttyq mýzeıde QR Mádenıet jáne sport mınıstrliginiń qoldaýymen tanymal koreıalyq sýretshi Lı Cholsýdyń «Kúlimdegen álem» atty kórmesi ashyldy, dep habarlaıdy QazAqparat. Kórmeni uıymdastyrýshylar - Koreıa Respýblıkasynyń Qazaqstandaǵy Elshiligi men QR Ulttyq mýzeıi.
Ulttyq mýzeı baspasóz qyzmetiniń málimetinshe, Lı Cholsýdyń búkil álemge áıgili grafıkalyq týyndylary qazaqstandyq ónersúıer qaýymǵa alǵash ret usynylyp otyr. Bul - ótken ǵasyrdyń 90-jyldarynan bastap 2017 jylǵa deıin salynǵan 60 grafıkalyq sýret.
Sharanyń ashylý saltanatynda sóz alǵan QR Ulttyq mýzeıi dırektorynyń mindetin atqarýshy Leonıd Kochetov sharanyń mańyzyna toqtaldy.
«Biz Qazaqstan Respýblıkasyndaǵy Koreıa elshiligimen tyǵyz baılanysta jumys jasap kelemiz. Ótken jyly Qazaqstan men Koreıa Respýblıkasynyń dıplomatııalyq qarym-qatynasyna 25 jyl tolýyna oraı «Koreı beıneleri» jáne «Qazaqstan káristeri» taqyrybynda kórmeler uıymdastyrǵanbyz. Osy baǵytta Elbasynyń «Bolashaqqa baǵdar: Rýhanı jańǵyrý» baǵdarlamalyq maqalasynan týyndaıtyn mindetter aıasynda Qazaqstan Respýblıkasy Mádenıet jáne sport mınıstrliginiń qoldaýymen «Altyn adamnyń álem mýzeılerine sherýi» jobasyn iske qosyp, Seýldegi Koreı Ulttyq mýzeıinde kórsetýdi josparlap otyrmyz. Bolashaqta eki el arasyndaǵy yntymaqtastyqty arttyrý maqsatynda túrli mádenı sharalar jalǵasyn tabady», - dedi.
Lı Cholsý soltústik Chhýnchhon provıntsııasynda ómir súrgen 30 jyldyń ishinde ónermen aınalysyp, eginshilik salasynda eńbek etken. Qarapaıym syzyqtarmen oryndalǵan áserli sýretter, olarǵa jazylǵan keremet mátinder - onyń eńbekteriniń basty ereksheligi.
Koreıa Respýblıkasynyń Qazaqstandaǵy Tótenshe jáne ókiletti elshisi Kım De-Sıktiń aıtýynsha, Lı Cholsý - óte talantty tulǵa.
«Onyń týyndylary beıbitshilik, birlik, tirshiliktegi ortaq úılesimdi nasıhattaıdy. Lı Cholsý shyǵarmashylyǵyndaǵy basty taqyryp - adamnyń ishki jan-dúnıesi. Lı Cholsý tek sýret salyp qana qoımaı, óleń de jazady. Onyń shyǵarmalary álemdik deńgeıde tanystyrylyp, kóptiń kóńilinen shyqqan bolatyn. «Kúlimdegen álem» sizderge de unaıdy dep senemin», - dedi ol óz sózinde.
Sýretshi Lı Cholsýdyń kórmeleri Bazel (Shvetsarııa, 2016), Sahalın (2017), Sıetl (2017) qalalarynda ótken. Bıyl Vengrııa, Ispanııa, Germanııa, Frantsııa jáne Belgııa syndy elderdi qamtyǵan eýropalyq týrneniń bir bóligi retinde Qazaqstanǵa keldi.
