Ulttyq mýzeıde «Eskerýsiz qalǵan eskertkishter» atty fotokórme ashylady
ASTANA. QazAqparat - Qazaqstan Respýblıkasy Ulttyq mýzeıinde erteń, 27 sáýirde Eskertkishter men tarıhı oryndardyń halyqaralyq kúnine oraı «Eskerýsiz qalǵan eskertkishter» atty fotokórmeniń ashylýy ótedi, dep habarlaıdy Ulttyq mýzeıdiń aqparattyq-ımıdjdik qyzmeti.
Kórmeniń basty maqsaty - Qazaqstan aýmaǵynda tabıǵı, tehnogendik jáne adamı áserlerden buzylyp jatqan eskertkishterdiń qazirgi jaı-kúıin kópshilik nazaryna usyna otyryp, tarıhı muralarǵa degen qoǵam jaýapkershiligin arttyrý. Sonymen qatar eskertkishterdi qaııta qalpyna keltirý baǵytynda atqarylǵan jumystardyń nátıjelerin kórsetý.
Fotokórmede buzylyp jatqan jáne qalpyna keltirilgen eskertkishterdiń sýretteri tórt topqa jiktelgen:
1. «Tabıǵı apattan buzylyp jatqan eskertkishter»;
2. «Tehnogendik jaǵdaıdan buzylyp jatqan eskertkishter»;
3. «Adamdardyń qolymen buzylǵan eskertkishter»;
4. «Qaıta qalpyna keltirilgen eskertkishter»;
Kórmege qoıylǵan foto materıaldar «Qazrestavratsııa» RMM, Jambyl, Qyzylorda, Aqmola, Aqtóbe, Mańǵystaý oblystarynyń Tarıhı-mádenı muralardy qorǵaý memlekettik mekemelerinen jáne Z. Samashev, M. Eleýov, K. Baıpaqov, A. Beısenov, D. Baıtileý, Ǵ. Omarov, A. Nurjanov, A. Ońǵar, E. Oralbaı, E. Aqymbek syndy arheolog-ǵalymdardyń jeke muraǵat qorlary men ǵylymı-kópshilik jarııalanymdarynan alyndy.
