Ulttyq mýzeıde «Elin tanytqan Elbasy» atty fotokórme ashyldy (FOTO)

ASTANA. QazAqparat - Búgin Qazaqstan Respýblıkasynyń Ulttyq mýzeıinde 1 jeltoqsan - Tuńǵysh Prezıdent kúnine oraı «Elin tanytqan Elbasy» atty fotokórme ashyldy. Kórmege Memleket basshysy N.Nazarbaevtyń ómirbaıany men ómir joly týraly syr shertetin qundy fotosýretter qoıylǵan.

«Bizdiń kórshimiz - Ózbekstan eliniń Prezıdenti Islam Kárimov Nursultan Nazarbaev týraly: «Ómirde jyldar óte aqyl jınap, danaǵa aınalatyn adamdar bar. Al, meniń oıymsha, Nursultan Ábishulyna Alla bala kezinen erekshe aqyl bergen», - dep jazady. Al Túrkııanyń burynǵy Prezıdenti Abdýlla Gúl «Biz Qazaqstan Prezıdentin Túrki áleminiń kóshbasshysy dep sanaımyz» degeni taǵy bar. AQSh Prezıdenti: «N.Nazarbaev - ıadrolyq qaýipsizdik máselesinde teńesýge umtylýǵa turatyn kóshbasshylardyń biri. Vashıngtondaǵy Sammıt onsyz ótpes edi»,-degen eken. Meniń oıymsha, álem elderi basshylarynyń osyndaı pikir bildirýi - Qazaqstan halqyna berilgen zor baǵa. Osy fotokórmege kelgen adamdar tek Qazaqstan tarıhyn tanyp qana qoımaı, táýelsiz Qazaqstannyń tarıhyn qurmetteýdi, baǵalaýdy úırenedi dep oılaımyn. Sondyqtan,kórmege qosh keldińizder!» - dedi kórmeni asha otyryp, mýzeı dırektory Darhan Myńbaı.

Kórmeniń ashylýyna qatysqan qoǵam qaıratkeri Ǵarıfolla Esim Memleket basshysy N.Nazarbaevtyń alǵashqy saılaýyn eske aldy.

«Keńes odaǵy kezinde Qazaqstannyń basshysyn Máskeý taǵaıyndady. Odaq ydyraǵan soń, biz táýelsizdik aldyq. Biraq, óz basshysy joq, halqy artynan eretin kósh bastaýshy adamy joq memleket qalaı táýelsiz bolmaq!? Osylaısha, 1991 jyly qazaqstandyqtar tuńǵysh ret Elbasyn ózderi saılady. 1991 jyldyń 1 jeltoqsanynda ózimiz baryp, Nursultan Ábishulyna daýys bergenimiz áli kóz aldymyzda. Sondyqtan da, bul kún - Tuńǵysh Prezıdent kúni retinde toılanýǵa laıyq», - deıdi Ǵ.Esim.