Ulttyq mýzeıde Elbasy kitaphanasynyń jınaǵynan jasaqtalǵan kórme ashyldy
Tuńǵysh Prezıdent kúnine oraılastyrylǵan kórmege qazaqstandyq qoǵam qaıratkerleri, olardyń ishinde Igor Rogov, Qýanysh Sultanov, Darhan Myńbaı, Azat Perýashev jáne sheteldik elshilik ókilderi qatysty.
Atalmysh kórme kópultty Qazaqstan halqynyń rýhanı qundylyqtaryn jahandyq deńgeıde ilgeriletýde, mádenıetti qaıta jańǵyrtýda Elbasy N.Á. Nazarbaevtyń rólin beıneleýdi kózdeıdi.
«Búgingi Qazaqstan Respýblıkasynyń Ulttyq mýzeıimen birlese ashylǵaly otyrǵan «Elbasy jáne mádenıet» kórmesiniń elimizdiń mádenı ómirinde eleýli oqıǵa bolatynyna senimdimin! Ótkenge kóz júgirtsek, elimiz egemendik alǵan boıdan bastap óziniń tarıhı jańǵyrý jáne damý kezeńderin bastan keshirdi. Táýelsizdikke qol jetkizgennen keıin, ásirese, egemendigimizdiń alǵashqy on jyldyǵy ult mádenıeti úshin jańa kezeń boldy. Rýhanııatymyz qaıta túlep, tarıh tasasynda qalǵan barlyq muralarymyz Elbasy bastamasymen halqymyzǵa orala bastady. Tuńǵysh Prezıdentimiz usynǵan «Mádenı mura» memlekettik baǵdarlamasynyń tıimdi oryndalýy nátıjesinde rýhanı baı muralarymyz zerdeli urpaqtyń zeıinin ashyp, kóne tarıhty qaıta jańǵyrtty», – dep is-sharanyń ashylý rásiminde Elbasy kitaphanasynyń dırektory Ámirhan Rahymjanov atap ótti.
Odan soń QR Ulttyq mýzeıiniń dırektory Arystanbek Muhamedıuly: «Búgin Tuńǵysh Prezıdent kúnine arnalǵan saltanatty sharanyń bizdiń Ulttyq mýzeıde ótip jatqanyna óte qýanyshtymyz. Biz Qazaqstan Respýblıkasynyń Tuńǵysh Prezıdenti – Elbasy kitaphanasynyń basshylyǵyna Nursultan Ábishuly Nazarbaevtyń ıdeıalary men bastamalaryn saqtaýǵa, keńinen taratýǵa baǵyttalǵan is-sharalary úshin, osy kórmege, elimizdiń táýelsizdik tarıhy týraly baıandaıtyn biregeı eksponattar usynǵany úshin úlken alǵysymyzdy bildiremiz», - dedi.
Elbasy kitaphanasynyń «Elbasy jáne mádenıet» atty kórmesi Qazaqstan Respýblıkasynyń sáýleti men kıno óneri, qoldanbaly jáne beıneleý óneri, mýzeı, teatr, arhıv, kitaphana salasy, táýelsizdik jyldaryndaǵy mádenıet salasynyń memlekettik saıasaty, tarıhı-mádenı eskertkishterdi qorǵaý salasy sııaqty baǵyttardyń negizinde Elbasy kitaphanasy arhıviniń 170-ten astam materıalyn usynady.
Atalmysh kórme 2020 jyldyń 5 qańtaryna deıin jalǵasady.
