Ulttyq mýzeıde dástúrli koreı kıimderiniń kórmesi ashylady
ASTANA. QazAqparat - 12 qazan kúni saǵat 16.00-de Qazaqstan Respýblıkasy Ulttyq mýzeıi Koreıa Respýblıkasy Elshiliginiń Koreı mádenı ortalyǵymen birigip dástúrli koreı kıimderiniń «Hanbok sıqyry» kórmesin ashady, dep habarlaıdy QazAqparat.
Ulttyq mýzeıdiń baspasóz qyzmeti taratqan málimetterge sáıkes, ekspozıtsııaǵa taqta otyrǵan Choson áýletinen bastap, búgingi koreıdiń dástúrli «hanbok» kıiminiń ár túrin kórsetetin 96 eksponat qoıylady. Usynylatyn eksponattardyń arasynda kóptegen qazaqstandyq kórermender unatqan «Hanzada Jýmong» koreı serıalynyń bas keıipkerleriniń túpnusqa kostıýmderi de bar.
Hanbok - koreı tilinen aýdarǵanda koreı mádenıetiniń iske asqan pálsapalyq kózqarastaryn, estetıkasyn jáne ózindik ereksheligin kórsetetin «koreı kıimi» degendi bildiredi. Osydan 100 jyldaı ýaqyt buryn, Koreıada batystyq úlgidegi kıimder paıda bolǵanǵa deıin, hanbok káristerdiń kúndelikti kıimi sanalǵan.
Búgingi tańda hanbokty ádette ulttyq merekeler (Chýsok - egin merekesi, Jańa Aı jyly) jáne otbasylyq saltanattar kezinde kıedi. Korol áýletiniń hanboktary qolaısyz úlkendigimen erekshelendi, solaı bola tura olar ásemdigimen, talǵamdylyǵymen jáne sándiligimen tań qaldyrdy. Qymbat ári kúrdeli oıýlar qolmen kesteleý, balaýyzben boıaý syndy tehnıka kómegimen jasaldy. Al, erekshe saltanatty kıimderge kúmisten sándik áshekeıler tigildi. Choson áýletiniń kıimderin dástúrli túrde áıelder tikti jáne kúrdeli zer salynǵan kıimdi daıyndaýǵa birneshe jyl ketetin bolǵan.
Kárister áleýmettik mártebesine sáıkes kıingen, sondyqtan kıim qoǵamdaǵy ornynyń aıyrym belgisi qyzmetin atqarǵan. Ústem tap ókilderi óz mártebelerine kóńil aýdartý úshin zergerlik áshekeılerdi de paıdalanǵan. Áıelder úshin tabıǵat elementteriniń birine uqsatyp jasalǵan ári jibek lentamen bezendirilgen asyl tastardan jasalǵan alqa dástúrli áshekeı sanaldy. Konfýtsıı qoǵamy áıelderdiń kıim mádenıetinen de sezilip turatyn ıbalylyqty jáne tazalyqty olardyń eń joǵarǵy izgiligi sanaǵan. Sondyqtan áıelder kóshege shyqqan kezde júzderi men denelerin arnaıy shálimen nemese jamylǵymen jabatyn bolǵan. Kıimde jáne aksessýarlarda uzaq ta baqytty ómir, baılyq jáne tanymaldylyq, qadirleı jáne súıe alatyn urpaq tileıtindigin bildiretin ártúrli gúlderdiń sándik naqyshtary qoldanyldy.
«Hanbok sıqyry» kórmesi kórermenderdi koreı mádenıetiniń tańǵajaıyp álemimen tanystyrady jáne Koreıanyń san ǵasyrlyq dástúrleriniń ereksheligin sezinýge múmkindik beredi.
