Ulttyq mýzeıde balalarǵa arnalǵan jańa ekspozıtsııa tanystyryldy
NUR-SULTAN. QazAqparat – QR Ulttyq mýzeıinde «Meniń Qazaqstanym» mádenı-bilim berý ekspozıtsııasy tanystyryldy. Munda balalar damytý oıyndary arqyly týǵan ólke tarıhy men mádenıeti jóninde kóbirek bile alady, dep habarlaıdy QazAqparat tilshisi.
«Búgin Ulttyq mýzeıde oqý jylynyń alǵashqy kúnderi QR Táýelsizdiginiń 30 jyldyǵyna arnalǵan «Meniń Qazaqstanym» mádenı-bilim berý ekspozıtsııasyn tanystyramyz. Joba arqyly rýhanı damýǵa, jas urpaqty Qazaqstannyń tarıhy men mádenıetine, geografııasyna baýlýǵa baǵyttalǵan balalar ekspozıtsııasy ashylady. Ekspozıtsııalyq joba 10 aqparattyq bólikten quralǵan, onda Qazaqstannyń arheologııasy, etnografııasy, tarıhy men mádenıeti, tabıǵaty týraly aıtylady», - dedi QR Ulttyq mýzeıi dırektorynyń orynbasary Abaı Satýbaldın joba tanystyrylymynda.
Ekspozıtsııada balalardyń ózderi arheologııalyq qazba jumystaryn júrgizip, qazaq taǵamdarymen tanysyp, ulttyq oıyndardy oınap, qazaq halqynyń salt-dástúrin baıandaıtyn beınerolıkterdi kóre alady. Ekspozıtsııalyq jobalar balalarǵa ejelgi zattardy jaqynnan tamashalaýǵa jáne ustap kórýge múmkindik beredi. Osylaısha balalar halqynyń tarıhy men mádenıetin tereńirek túsinedi.
«Bizde arnaıy oqytý baǵdarlamasy ázirlendi, onda túrli sabaqtar men kvestter ótkizemiz, balalar bárine tegin qatysa alady. Eger mektepter qosymsha is-shara ótkizgisi kelse, oǵan da kómektesemiz. Jyl sońyna deıin arnaıy QR-kodtar jasaýdy josparlap otyrmyz, ol arqyly nashar kóretin, sańyraý adamdarǵa arnalǵan kontent qoljetimdi bolady, jalpy bárin jetildire túsemiz», - deıdi A. Satýbaldın.
Sondaı-aq, mýzeıde mekteptermen jáne túrli bilim berý uıymdarymen jumys isteıtin arnaıy mýzeı pedagogıkasy ortalyǵy jumys isteıdi. Balalarǵa arnalǵan barlyq tapsyrmalar men oıyndar sol mamandardyń usynystarymen ázirlengen.
Bul joba túrli-tústi bezendirilgen 10 aqparattyq jáne oıyn bólikterinen turady, olar balalarǵa qoljetimdi quraldar arqyly Qazaqstannyń tarıhymen jáne tabıǵatymen tanystyrady.
Ekspozıtsııalyq zal kireberisinde elimizdiń ejelgi qalalary, keseneleri men basty kórikti jerleri beınelengen geografııalyq karta ornalasqan. Tórt túıe balalardy Uly Jibek jolynyń kartasyna alyp barady, onda kerýen ótken barlyq elder men qandaı jádigerler tabylǵany jazylǵan. Balalar ózderin naǵyz arheolog retinde sezinýi úshin qumnan túrli fıgýralar men eksponattar tabýy kerek. Qyzdar pishý men tigýdi úırenedi, al uldar kúres, sadaq atý, toǵyzqumalaq syndy ulttyq oıyndardy oınaı alady. Sonymen birge, sazdan músin jasaý múmkindikteri de qarastyrylǵan. Qyzyqty sapar sońynda balalar óz pikirlerin tilekter kitabyna qaldyra alady.
