Ulttyq mýzeıde A. Ahmedııarovtyń «Jalǵyz da kóp» kórmesi ashyldy (FOTO)
ASTANA. QazAqparat - Qazaqstan Respýblıkasy Ulttyq mýzeıinde Ashat Ahmedııarovtyń «Jalǵyz da kóp» kórmesi ashyldy, dep habarlaıdy Ulttyq mýzeıdiń aqparattyq-ımıdjdik qyzmeti.
Kórmeniń saltanatty ashylýynda sóz alǵan Ulttyq mýzeı dırektory Darhan Myńbaı Ashat Ahmedııarovtyń týyndylarynyń ereksheligine toqtalyp ótip, onyń ónerine shyǵarmashylyq tabystar tiledi.
«Ashat Ahmedııarovty kórkem sýret, fotosýret, vıdeo, ınstallıatsııa jáne performans salalarynda jumystanyp júrgen tanymal sýretshi retinde bilemiz. Onyń týyndylary bizdiń elimizde de, shet elderde de joǵary baǵalanyp júr. Sebebi onyń jumystarynyń ózindik boıaýy bar, ózindik stıli qalyptasqan. Tıisinshe suranys ta joq emes. Avtordyń mán-mazmuny tereń kórmesiniń Ulttyq mýzeıde ótýi elimizdiń kúlli kórkemdik álemindegi mańyzdy kezeńi bolmaq dep oılaımyn. Sondyqtan da Ashatqa shyǵarmashylyq tabystar tileı otyryp, ónerdiń bıik shyńdaryn baǵyndyrýyna tilektespin», - dedi D.Myńbaı.
Ashat Ahmedııarov óziniń avtorlyq kórmesi týraly aıta kele, osyǵan deıin onyń talantyna qoldaý kórsetip kelgen óner janashyrlaryna alǵys bildirdi.
«Usynyp otyrǵan jumystarymnyń kópshiligin osy kórmege arnaıy daıyndadym. Álbette, ónerdiń joly ońaı emes. Osy ýaqytqa deıin kóptegen syndardan ótip, ómirimniń eń qıyn sátterin artta qaldyrdym dep oılaımyn. Dese de men qaıta óner jolyn tańdadym. Belgili bir deńgeıge jetý úshin kóp eńbektený qajet boldy. Bul rette men Ulttyq mýzeıdiń dırektory Darhan Myńbaı myrzanyń, Halyqaralyq Ónerdi damytý assotsıatsııasynyń negizin qalaýshy Dına Baıtasovanyń erekshe qoldaýlaryna ıe boldym. Sol úshin de búgin kópshilik aldynda ol kisilerge úlken alǵysymdy bildirgim keledi. Bizdiń qoǵamda da ónerdi joǵary baǵalaı biletin osyndaı jandardyń bar ekenine qýanyshtymyn», - dedi A.Ahmedııarov.
Aıta keteıik, Ulttyq mýzeı bul kórmeni Qazaqstan Respýblıkasy Mádenıet jáne sport mınıstrligi, Astana qalasy ákimshiligi jáne Halyqaralyq Ónerdi damytý assotsıatsııasynyń qoldaýymen birlesip ótkizdi.
«Jalǵyz da kóp» kórmesi 2016 jylǵy 17 maýsymǵa deıin jumys isteıdi.
