Ulttyq mýzeı alǵashqy ǵylymı-zertteý jumystaryn Botaı qonysynan bastamaq
ASTANA. QazAqparat - 2014 jyldyń 1 tamyzynda Qazaqstan Respýblıkasy Ulttyq mýzeıiniń ǵylymı qyzmetkerleri mýzeıdiń ǵylymı jumystar boıynsha dırektor orynbasary, t.ǵ.k. Oljas Sharnııazdanovtyń jetekshiligimen Soltústik Qazaqstan oblysyna eneolıt dáýiriniń biregeı eskertkishi - Botaı qonysyna zertteý jumystaryn júrgizý úshin arheologııalyq ekspedıtsııaǵa shyǵady. Bul týraly mýzeıdiń baspasóz qyzmetinen habarlady.
Ulttyq mýzeı osy ekspedıtsııa arqyly derbes ǵylymı mekeme retinde alǵashqy dala jumysyna kirisip, ǵylymı-zertteý qyzmetin bastaıdy.
Ekspedıtsııanyń maqsaty Qazaqstan tarıhy men mádenıeti úshin orny erekshe eskertkishti zerttep qana qoımaı, sonymen qatar ǵylymı qyzmetkerlerdiń áleýetin keshendi jáne jan-jaqty damytý jáne Qazaqstannyń ejelgi jáne ortaǵasyrlyq arheologııasynyń ártúrli baǵyttary boıynsha ǵylymı taqyryptar bekitý bolyp tabylady. Qazaqstan Respýblıkasynyń Ulttyq mýzeıiniń qoryn Botaı qonysyna baılanysty materıaldarmen tolyqtyrý maqsatyndaǵy ǵylymı júıeleý jáne laboratorııalyq óńdeý jumystaryna qatysty jumys jasaý da mańyzdy baǵyttardyń biri bolyp sanalady.
Arheologııa professory, t.ǵ.d. Vıktor Zaıbert qyzmetkerler úshin Botaı eneolıt qonysyna júrgiziletin qazba jumystarynyń ádisteri boıynsha sheberlik-synybyn júrgizedi.
Botaı arheologııalyq eskertkishi 1980 jyly ashyldy. Ol Soltústik Qazaqstan oblysynyń Aıyrtaý aýdanynda ornalasqan. Qonystyń aýmaǵy - 15 gektar.
Osydan 30 jyl buryn qazaqstandyq arheolog, tarıh ǵylymdarynyń doktory Vıktor Zaıbert ejelgi álemniń damýy týraly kóptegen túsinikti ózgertken Botaı eneolıt qonysyn ashty. Eýropalyq ǵalymdar dál osy jerde jylqynyń qolǵa úıretilgenin dáleldedi. Qazba jumystarynyń bastalǵanyna bir apta ótisimen-aq 40 myńnan astam artefakt jınaýǵa múmkindik týdy. Júrgizilgen qazba jumystary barysynda 200 myńnan astam artefakt jınaldy.
Botaı qonysy alty júz jylǵa jýyq jasady. Sol ózi jasaǵan aralyqta qonysta 250-ge jýyq baspana salynǵan.
Botaıdyń ashylýy dınamıkalyq tarıh, mádenıettiń qalyptasýy - adamzat qaýymynyń qorshaǵan ortaǵa ǵalamdyq beıimdelýi osy jerde bastalǵanyn anyqtaýǵa múmkindik berdi. Dál osy botaılyqtar adamdardyń dala jaǵdaıynda ómir súrýi áreketiniń túrin jasaqtaǵan, dál osy jerde dala órkenıeti qalyptasty.
