Ulttyq munaı-hımııa tehnoparkinde 2 joba iske asty

NUR-SULTAN. QazAqparat – Energetıka mınıstri Nurlan Noǵaev Májiliste ótken otyrysta «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵynyń qazirgi jaǵdaıy týraly málimet berdi, dep habarlaıdy QazAqparat tilshisi.

«Búgingi tańda arnaıy ekonomıkalyq aımaq aýmaǵynda 10 qatysýshy tirkelgen, olardyń ekeýi jobasyn iske asyrdy. Eki joba boıynsha qurylys júrgizilýde jáne 6 joba jobalaý satysynda tur. 2021 jylǵy 1 mamyrdaǵy jaǵdaı boıynsha, tartylǵan ınvestıtsııalar kólemi – 850 mlrd teńge boldy. 23,1 mlrd teńgeniń ónimi shyǵarylyp, 820 turaqty jáne 3383 ýaqytsha jumys orny ashyldy», - dedi Energetıka mınıstri.

Sondaı-aq, ol «Ulttyq ındýstrııalyq munaı-hımııa tehnoparki» arnaıy ekonomıkalyq aımaqtyń ınfraqurylymyn tartýǵa memleketten 161,7 mlrd teńge bólingenin atady.

«Osy qarajatqa temir jol jáne avtomobıl joldary, ınjenerlik jeliler men jalpy zaýyttyq sıpattaǵy ózge de qajetti ınfraqurylymdyq obektiler salyndy. Sondaı-aq, qýaty 310 mVT-ty quraıtyn gaztrýbınalyq elektrostansasy, paıdalanýǵa berildi jáne sý daıyndaý qondyrǵysynyń qurylysy júzege asyrylýda. Birinshi kezeńdegi ınfraqurylymdyq obektiler polıpropılen óndirý jónindegi zaýyttyń jumys isteýin qamtamasyz etýge arnalǵan», - dedi mınıstr.