«Ulttyq medıtsınalyq holdıngi» AQ-da jańa taǵaıyndaýlar boldy
ASTANA. Qańtardyń 27-si. QazAqparat - Elordada ótken «Ulttyq medıtsınalyq holdıngi» AQ Dırektorlar keńesiniń otyrysynda atalǵan holdıng basqarmasy tóraǵasynyń medıtsınalyq máseleler jónindegi orynbasary bolyp Tamara Voşenkova, ekonomıka jáne qarjy jónindegi orynbasary bolyp Sáýle Tájibaeva taǵaıyndaldy.
Bul aqparatty holdıngtiń baspasóz qyzmeti taratyp otyr.
Tamara Voşenkova 1959 jyly dúnıege kelgen. Qaraǵandy memlekettik medıtsına ınstıtýtyn bitirgen. Osy ýaqytqa deıin ol Qaraǵandy oblystyq densaýlyq saqtaý basqarmasy dırektorynyń orynbasary, bólim bastyǵy, Qazaqstan Respýblıkasynyń Densaýlyq saqtaý vıtse-mınıstri qyzmetin atqarǵan.
Sáýle Tájibaeva 1975 jyly dúnıege kelgen. Qazaq memlekettik basqarý akademııasyn támamdaǵan. Jańa taǵaıyndaýǵa deıin Ulttyq medıtsınalyq holdıngtiń ekonomıka jáne qarjy jónindegi basqarýshy dırektory laýazymynda qyzmet atqarǵan. S.Tájibaeva ár jyldary «QazTransGaz» AQ Bıýdjettik josparlaý jáne ekonomıkalyq saraptama departamentine, QR Densaýlyq saqtaý mınıstrligi Ekonomıka jáne qarjy departamentine basshylyq jasaǵan.
Otyrys barysynda Ulttyq medıtsınalyq holdınginiń enshiles uıymdarynyń Dırektorlar keńesiniń tóraǵalary bekitilip, buǵan deıingi Dırektorlar keńesi ókilderiniń ókilettiligi toqtalǵan.
Sonymen, Sharman Almaz Tóregeldiuly - «Respýblıkalyq dıagnostıka ortalyǵy» AQ, «Ulttyq medıtsınalyq holdıngi» AQ basqarmasynyń tóraǵasy; Voşenkova Tamara Anatolevna - «Ulttyq ana men bala ǵylymı ortalyǵy»; Sultanov Toqan Anarbekuly - «Respýblıkalyq jedel medıtsınalyq járdem ǵylymı ortalyǵy»; Asatova Aqmaral Bolataıqyzy - «Respýblıkalyq balalardy ońaltý ortalyǵy» AQ Dırektorlar Keńesiniń tóraǵasy bolyp taǵaıyndaldy.
