«Ulttyq medıtsınalyq holdıng» jyldyń sońyna deıin donor júregin transplantatsııalaý operatsııasyn josparlap otyr
ASTANA. 9 tamyz. QazAqparat - «Ulttyq medıtsınalyq holdıngtiń» emhanalarynda aǵymdaǵy jyldyń sońyna deıin júrek transplantatsııalaý operatsııasyn jasaý josparlanýda, dep habarlady holdıngtiń basqarma tóraǵasynyń orynbasary Lázzat Aqtaeva pm.kz saıtyna bergen suhbatynda.
«Aǵymdaǵy jyly 41 ınnovatsııalyq tehnologııa engizý josparlanýda, biraq eń negizgisi - aǵzalar transplantatsııalaý tehnologııasy bolmaq. Biz donordyń júregin jáne búıregin transplantatsııalaý operatsııalaryn jasaımyz», - dedi L.Aqtaeva.
Ulttyq ǵylymı kardıohırýrgııalyq ortalyqtyń júrek transplantatsııalaý operatsııasyna daıyn ekenin aıtyp ótken L.Aqtaeva, degenmen ol úshin máıitten alynatyn aǵzalar donorlyǵyn damytý kerektigin atap kórsetti.
«Organdy alý, onyń tirshilik qabiletin saqtaý, retsıpıentti daıyndaý úrdisi biraz ýaqytty alady, biraq Ortalyqtyń barlyq resýrsy qazir oǵan daıyn. Eger jaǵdaı ońynan qalyptassa, jyldyń aıaǵyna deıin biz bul tehnologııany engizbekpiz»,- dedi ol.
Aıta ketý kerek, Jedel medıtsınalyq járdem ortalyǵynda búırek transplantatsııalaý operatsııasy jasaldy. Ázirge týystyq donorlyq oqıǵalary ǵana tirkelip otyr.
Ótken jarty jylda emdeý men dıagnostıkanyń 10 tehnologııasy engizilgenin aıtý kerek. Olardyń qatarynda - julyn mıyn neırostımýlıatsııalaý, júrektiń aorta klapanyn teri arqyly protezdeý, shaǵyn ınvazıvti emdeý tásili arqyly kardıohırýrgııalyq operatsııalar jasaý, t.b. operatsııalar bar.
Oǵan qosa, sozymaly búırek aýrýymen aýyratyn balalarǵa búırek aýystyryp salý úshin Ana men bala ortalyǵynyń mamandary Koreıa ýnıversıtetine taǵlymdamadan ótýge jiberilýde. Oqýǵa osyndaı biregeı operatsııaǵa qatysatyn anestezıolog, nefrolog, ýrolog sııaqty mamandardyń barlyǵy jiberildi.
L.Aqtaevanyń aıtýynsha, 2008 jyldan bastap klınıkalarda túrli aýrýlardy emdeý men dıagnostıkalaýdyń 110 ınnovatsııalyq tehnologııasy engizilip otyr. «Bizdiń naýqastarymyz buryn osy operatsııalardy jasatý úshin shetelderge barýǵa májbúr bolsa, endi olar holdıngtiń emhanalarynda emdele alady», - dedi basqarma tóraǵasynyń orynbasary.
Jańa tehnologııalardy engizý sondaı-aq, elimizde medıtsınalyq týrızmdi ári qaraı damytýǵa áleýet jasaıdy jáne sheteldik patsıentter úshin emhanalardyń tartymdylyǵyn arttyrady. І jartyjyldyqta 21 eldiń 150 azamaty bizdiń elimizde em-dom qabyldady.
