«Ulttyq medıtsınalyq holdıng» AQ men eldegi ÚEU-lar arasynda memorandým jasaldy
ASTANA. 16 mamyr. QazAqparat /Jasulan Amanbaıuly/ - Búgin Astanada medıtsına qyzmetiniń sapasyna arnalǵan dóńgelek ústel jumysy barysynda «Ulttyq medıtsınalyq holdıng» AQ eldegi ÚEU-larmen memorandým jasasty.
Sharaǵa túrli áleýmettik toptardyń kózqarastaryn qorǵap júrgen «Qazaqstandyq gemofılııamen naýqastanǵan múgedekter qaýymdastyǵy» QB, «Amansaýlyq» qoǵamdyq qory, «QR Dıabet qaýymdastyǵy», «Qazaqstandyq gemoblastozben naýqastanǵan múgedekter qaýymdastyǵy», «Deni saý Azııa» qaýymdastyǵy, Qazaqstan dárigerleri men provızorlary qaýymdastyǵy», «Astana qalasynyń táýelsiz medıtsınalyq sarapshylardyń qaýymdastyǵy» syndy uıymdar men «Ulttyq medıtsınalyq holdıng» AQ-nyń basshylary, holdıng quramyndaǵy klınıkalardyń dárigerleri qatysty. Taraptar patsıentterdiń quqyqtaryn qorǵaý jáne saqtaý salasynda áriptestik ornatý jóninde memorandýmǵa qol qoıdy.
Atalmysh kelisim, taraptardyń pikirinshe, ortaq saraptama toptarynyń ózara keńesterin ótkizýge, birlesken ǵylymı zertteýlerdi jasaýǵa, baǵdarlamalar men jobalardy atqarýǵa múmkindik beredi.
«Medıtsınalyq qyzmet sapasy, naýqastardyń qaýipsizdigi - Ulttyq medıtsınalyq holdıng úshin strategııalyq bolyp tabylady. Medıtsınalyq qyzmet sapasyn árdaıym júıeli jáne turaqty túrde basqaryp otyrý kerek. Sharanyń basty maqsaty - medıtsınalyq qyzmet sapasyn arttyrý jolyndaǵy birlesken is-qımyldar men qadamdardy talqylaý»,-dedi «Ulttyq medıtsınalyq holdıngi» AQ basqarma tóraǵasy Eljan Birtanov.
Onyń aıtýynsha, ishki aýdıt jekelegen adamdardyń medıtsınalyq qyzmet sapasyna nelikten kóńilderi tolmaıtyndyqtaryn tolyq ashyp, anyqtaı almaıdy. Al beıimdik uıymdar, baqylaý tájirıbesiniń kóptiginen, beıimdik patsıenttermen kóp jumys jasaıtyndyqtan, medıtsına sapasynyń qanaǵattanarlyq emes nátıjesine júıeli baǵa bere alady.
«Osy oraıda biz ÚEU-men aradaǵy áriptestikke óte úlken úmit artamyz. Bul bizdiń júıedegi kemshilikterdi, atap aıtqanda medıtsına qyzmetiniń sapasyn basqarý salasyndaǵy olqylyqtardy joıýǵa kómektesedi»,-dep atap kórsetti ol.
Jıynda, sonymen qatar naýqastardyń quqyqtaryn qorǵaý, medıtsınalyq kómektiń qoljetimdiligi men sapasy, medıtsınalyq tehnologııalardyń tıimdiligi men qaýipsizdigi, dári-dármekpen qamtamasyz etý máseleleri, sonymen qatar holdıng pen ÚEU arasyndaǵy áriptestikti damytýdyń negizgi prıntsıpteri men tetikteri saralandy.
Qazir Ulttyq medıtsınalyq holdıngtiń 5 ınnovatsııalyq medıtsınalyq ortalyǵy bar. T. Voşenkovanyń aıtýynsha, búgingi tańda olar táýligine 100 myńnan astam patsıentti qabyldaýda. Holdıngke qarasty klınıkalarda 4 myńnan astam medıtsınalyq qyzmetker qyzmet atqarady. Shilde aıynda 180 jatyn orny bar Kardıo-hırýrgııalyq Ulttyq ǵylymı ortalyq ashylmaq.
