Ulttyq medıtsına qaýymdastyǵy Túrkistanda qaıtys bolǵan dárigerlerdiń esimderin olar jumys istegen aýrýhanalarǵa berý jóninde bastama kóterdi
ASTANA. Mamyrdyń 31-i. QazAqparat /Ernur Aqanbaı / - Qazaqstannyń Ulttyq medıtsına qaýymdastyǵy Túrkistanda kongo-qyrym qandy bezgegi ınfektsııasyn juqtyrǵan patsıentti emdeý barysynda qaıtys bolǵan dárigerler jumys istegen aýrýhanalardy olardyń esimderimen ataýdy usyndy.
Búgin Densaýlyq saqtaý isin damytýdyń «Salaýatty Qazaqstan» atty 2011-2015 jyldarǵa arnalǵan Memlekettik baǵdarlamasyn taqlylaýǵa arnalǵan Úkimettiń keńeıtilgen keńesinde atalmysh qaýymdastyqtyń prezıdenti Aıjan Saǵyndyqova osyndaı bastama kóterdi, dep habarlaıdy QazAqparat.
«Ótken aptada Túrkistan qalasynda kongo-qyrym qandy bezgegi ınfektsııasyn juqtyrǵan áıeldiń ómirin saqtaýǵa tyrysqan dárigerlerge qatysty sot isi aıaqtaldy. Ózderiniń kásibı mindetin oryndaý kezinde úsh dáriger kóz jumdy. Olar aýyrǵan áıelden kongo-qyrym qandy bezgeginiń ótkir ınfektsııasyn juqtyrdy. Álemde bul aýrýdy emdeýdiń áli eshqandaı joly tabylǵan joq. Alaıda, qazaqstandyq dárigerler patsıentti qutqara almaǵandary úshin jaýapkershilikke tartyldy. Sotqa rahmet, istiń baıybyna bardy jáne saýatty dárigerler qaıtadan ózderiniń súıikti isterimen aınalysý múmkindigine ıe bolyp otyr.
Qurmetti Kárim Qajymuqanuly, Sizden qaza tapqan dárigerler jumys istegen aýrýhanalarǵa olardyń esimin berý jónindegi bizdiń bastamamyzdy qoldaýdy ótinemiz», dedi A. Saǵyndyqova Úkimet basshysyna qaratyp aıtqan sózinde.
