«Ulttyq» mártebesi bar mádenıet mekemeleriniń jalaqysy artady

NUR-SULTAN. QazAqparat – QR Mádenıet jáne sport mınıstri Dáýren Abaev mádenıet salasyndaǵy qyzmetkerlerdiń áleýmettik qamtylýyn jaqsartýǵa ýáde berdi, dep habarlaıdy QazAqparat.

«Árıne, saladaǵy eń ózekti máselelerdiń biri – mádenıet uıymdary qyzmetkerleriniń áleýmettik paketi. «Ulttyq» mártebesi bar mádenıet uıymdarynyń laýazymdyq jalaqylaryna 1,75 koeffıtsıenti túrinde qosymsha aqylar men ústemeaqylar ázirleý qajet», - dedi Dáýren Abaev vedomstvonyń keńeıtilgen alqa otyrysynda.

Mınıstrdiń aıtýynsha, shyǵarmashylyq joǵary oqý oryndarynyń professor-oqytýshylar quramy men kontsertmeısterleriniń jalaqy mólsherine de nazar aýdarý qajet.

«Bul máseleni men óz baqylaýyma alamyn. Osy kúnderi men kezdestirgen kóptegen oqytýshylar, tipti eń qıyn 90-shy jyldary da óz mamandyqtaryn tastamaǵan. Solardyń arqasynda mádenıet pen ónerde urpaqtar úzilisi bolǵan joq», - dep atap ótti vedomstvo basshysy.