Ulttyq-mádenı ortalyqtardyń ókilderine qazaq tilin úıretetin jazǵy mektep ashylady
ALMATY. 10 shilde. QazAqparat - Almatyda 15 shildeden bastap etnomádenı ortalyqtardyń ókilderi úshin qazaq tilin úırenýdiń bir aılyq jazǵy mektebi óz jumysyn bastaıdy.
Ony QR Mádenıet jáne aqparat mınıstrliginiń qoldaýymen Demokratııany taratý ortalyǵy uıymdastyryp otyr.
«Biz buǵan deıin Halyqaralyq bıznes akademııasymen birlesip etnolager uıymdastyrdyq. Bul jobany endi mınıstrliktiń qoldaýymen júzege asyrmaqpyz. Almatydaǵy bul til úırený mektebiniń jumysy qatysýshylardyń deńgeıine qaraı anyqtalady. Eger jańadan úırenýshiler bolsa bastaýysh, al daıyndyǵy bolsa orta nemese joǵary deńgeıde ótkiziledi», - deıdi Demokratııany taratý ortalyǵynyń jetekshisi Dos Kóshim. Onyń aıtýynsha, ortalyq orys tildi aýdıtorııaǵa memlekettik tildi nasıhattaý jumysyn 3 jyldan beri júrgizip keledi. Eger bul joba sátti júzege asyrylatyn bolsa ol aldaǵy ýaqytta júıeli túrde júzege asyrylmaq.
