Ulttyq lıgadaǵy erler komandalary arasyndaǵy Qazaqstan chempıonatynyń 2-týrynda almatylyq voleıbolshylar kóshbasshylyqty saqtap qaldy
ALMATY. 12 jeltoqsan. QazAqparat /Erlik Erjanuly/ - Qyzyljarda 6-11 jeltoqsan kúnderi voleıboldan erler arasynda HH Qazaqstan chempıonatynyń 2-týry ótti.
Onda barlyq qarsylasynan basym túsken «Almaty» voleıbol klýby 28 upaımen týrnır kestesindegi kóshbasshylyqty saqtap qaldy. Bastapqy kezdesýlerde negizgi básekelesterin oısyrata utqan olar sońǵy 2 kezdesýdi 3:2 esebimen aıaqtap, qarsylastarymen upaı bólisti.
Jarys qorytyndysynda 21 upaımen Hromtaýdyń «TNK «Qazhromy» men 16 upaımen Óskemenniń «Shyǵys-QorǵasynQurylysy» úzdik úshtikte kele jatyr. Týrnır kestesiniń ekinshi jartysyndaǵylardyń qorjynynda «Atyraýda» - 12, jarys qojaıyndarynyń «Esilinde» - 10, al Oraldyń «Kondensatynda» - 3 upaı bar. El chempıonatynyń 3-týr oıyndary endi 12-17 qańtarda Óskemende jalǵasady.
