Ulttyq quryltaıdyń ózegi bolatyn úsh qundylyq ataldy

NUR-SULTAN. QazAqparat – Memlekettik keńesshi Erlan Qarın youtube kanalynda Ulttyq quryltaı negizge alatyn úsh qundylyqty atady, dep habarlaıdy QazAqparat tilshisi.

«Ulttyq quryltaıdyń jasaqtalýynda, onyń ótken orny men ýaqytynda birqatar ıdeologııalyq tujyrymdardy qamtıtyn oı bar. Birinshi oı – bizdiń memlekettigimizdiń tarıhy tym tereńde. Quryltaıdyń Joshy han kesenesi irgesinde ótkizilýinde erekshe mán jatyr. Bizdiń memlekettigimizdiń tarıhy Altyn Ordadan bastaý alyp, Qazaq handyǵy dáýirinde qalyptasyp, Alash Orda kezeńinde jalǵasyp, Táýelsizdik Qazaqstan tusynda qaıta jańǵyrdy. Ekinshi oı – ultty uıysýǵa úndeý. Quryltaıdyń birinshi otyrysy Ulytaýda ótti. Ekinshi jıyn Túrkistanda bolady. Bul halqymyz úshin kıeli jerler. Sondyqtan munda barsha halqymyzdy birlikke shaqyrǵan ıdeologııalyq oı bar. Quryltaıdyń dál osy ýaqytta ótýi dep beker emes. Keleli jıyn el damýynyń jańa baǵytyn aıqyndaǵan jáne ulttyń uıysýynyń jańa deńgeıge kóterilgenin kórsetken jalpyhalyqtyq referendýmnan keıin ótti. Úshinshi oı – memleket múddesi bárinen bıik. Respýblıka kúnin qaıta jańǵyrtyp, oǵan memlekettik mártebesiniń berilýi – Táýelsizdik ıdeıasymen memlekettik qundylyqtardy berik ornyqtyra túsýge baǵyttalǵan. Osy úsh qundylyq jańa qoǵamdyq shartty qalyptastyrý kezinde bizdiń eń basty baǵdarymyz bolady», – dep atap ótti Erlan Qarın.

Sonymen qatar Memlekettik keńesshi zań ústemdigin qamtamasyz etýge, pikir alýandylyǵyn qoldaýǵa jáne mańyzdy memlekettik sheshimder qabyldaıtyn ýaqytta qoǵamnyń pikirin eskerýge elimiz daıyn ekenin atap ótti.