Ulttyq quryltaıdyń kezekti otyrysynda jastardy tárbıeleý máselesi qaralady

ASTANA. QazAqparat – Ulttyq quryltaıdyń kezekti otyrysynda ulttyq ıdeologııa jáne jastardy tárbıeleý máselelerin qaraý josparlanǵan. Bul jaıynda Premer-Mınıstrdiń orynbasary Altaı Kólginov Májilis depýtattarynyń saýalyna bergen jaýabynda málim etti, dep habarlaıdy QazAqparat tilshisi.

Altaı Kólginovtiń aıtýynsha, Úkimet otansúıgishtik, ulttyq qundylyqtardy qalyptastyrý, qazaqstandyq biregeılikti damytý boıynsha keshendi jumystar júrgizip keledi. Sonyń aıasynda:

- Mektepke deıingi, orta, tehnıkalyq jáne kásiptik bilim berýdi damytýdyń 2023-2029 jyldarǵa arnalǵan tujyrymdamasyn;

- Joǵary bilimdi jáne ǵylymdy damytýdyń 2023 – 2029 jyldarǵa arnalǵan tujyrymdamasyn;

- Mádenı saıasattyń 2023-2029 jyldarǵa arnalǵan tujyrymdamasyn;

- 2023-2029 jyldarǵa arnalǵan memlekettik jastar saıasaty tujyrymdamasyn;

- Aqparattyq doktrınany qabyldaǵan.

«Osyǵan qosa, qoǵamdyq birigýdi odan ári damytý jónindegi ıdeıalar men qadamdardy tujyrymdaıtyn QRPrezıdent janyndaǵy Ulttyq quryltaı qyzmet atqarady. Ulttyq quryltaıdyń kezekti otyrysynda ulttyq ıdeologııa jáne jastardy tárbıeleý máselelerin qaraý josparlanǵan. Jalpy búgingi tańda qoldanystaǵy tujyrymdamalar men baǵdarlamalarda qazaqstandyq biregeılikti, ulttyq ıdeologııalyq qundylyqtardy dáripteıtin baǵyttar qarastyrylǵan», - dep jazady Altaı Kólginov.