Ulttyq quryltaıda rýhanı máseleni qaraý kerek - Edil Jańbyrshın

NUR-SULTAN. QazAqparat – Ulttyq quryltaıda kenje qalǵan rýhanı máseleni qaraý kerek. Bul týraly «Ulttyq quryltaı – qoǵamdyq dıalogtyń jańa modeli» atty «Sarap» eksperttik klýbynyń otyrysynda Májilis depýtaty Edil Jańbyrshın málim etti, dep habarlaıdy QazAqparat tilshisi.

«Prezıdent óziniń Joldaýynda quryltaıdy qurý jóninde másele kóterdi. Shynynda da Ulttyq qoǵamdyq senim keńesi belgili bir dárejede biraz sharýany atqardy. Endi osy keńestiń ornyna quryltaıdy qurý jónindegi másele talqylanyp jatyr. Quryltaı ne úshin kerek? Meniń oıymsha, ol bizdiń tarıhymyzda bar, ıaǵnı memleket úshin óte mańyzdy máseleler qaralatyn kezde, ony el bolyp sheshetin kezde halqymyz quryltaı jınaıdy. Úlken quryltaıdyń negizinde halyqpen birlesip, ortaq mámlege kelip, jahandyq máselelerge sheshim jasalǵan», - dedi E. Jańbyrshın.

Osy oraıda ol qoǵamda aýqymdy transformatsııalar bolyp jatqanyn aıtty.

«Keshegi qańtar oqıǵasynan keıin halyq Qazaqstannyń damýyna ekpin qoıyp otyr. Negizi, 30 jyl boıy qordalanyp qalǵan saıası-ekonomıkalyq, áleýmettik máseleler bar. Qańtarda qarapaıym halyqpen de, eldiń ortasynda júrgen aqsaqalmen de, saıası tulǵalarmen de kezdesken kezde barlyǵy ózgeristerdi talap etti. Sondyqtan osynyń barlyǵyn el de, halyq ta, bılik te jaqsy túsinip otyr», - dedi depýtat.

Bul turǵyda ol «halyq únine qulaq asatyn memleket» tujyrymdamasynyń mańyzdylyǵyn atap ótti.

«Quryltaıdy qurý úshin mańyzdy máselelerdi aıqyndap alý kerek. Birinshiden, onyń maqsaty qandaı? Ekinshiden, onyń mindetteri qandaı bolady? Biz quzyretterdi qaıtalamaýymyz kerek. Úshinshiden, onyń sany men sapasy qalaı bolady? Tórtinshiden, kún tártibine qandaı máselelerdi engizemiz? Tórtinshiden, quryltaı jıynyn ótkizý merzimi de mańyzdy. Sondyqtan osyndaı iri máselelerdi sheship alý qajet. Quryltaıdyń eń basty maqsaty – Qazaqstan halqyna qajetti taqyryptardy kún tártibine shyǵarý. Osy quryltaı bizde kenje qalǵan rýhanı máseleni qaraý kerek dep sanaımyn. Sebebi bizdiń memleketimizdiń uıytqysy – ulttyq ıdeologııamyz. Sol másele áli kúnge deıin sheshilmeı kele jatyr. Osy máseleler qamtylmasa, saıasat ta, ekonomıka da, áleýmettik másele de óz deńgeıinde sheshilmeıdi, sondaı-aq ádiletti qoǵamdy da qura almaımyz», - dedi Edil Jańbyrshın.

Eske sala keteıik, bıyl naýryz aıyndaǵy Joldaýynda Memleket basshysy Qasym-Jomart Toqaev ulttyq quryltaı qurýdy usyndy.