Ulttyq quryltaıda bilim salasyna qatysty ıdeologııalyq basym baǵyttar talqylandy – Ǵanı Beısembaev

ASTANA. QazAqparat – Elimizdiń rýhanı astanasy Túrkistanda ótken Ulttyq quryltaıda bilim salasyna qatysty uzaq merzimge arnalǵan ıdeologııalyq basym baǵyttar talqylanyp, naqty sheshý joldary usynyldy. Eki kúnge jalǵasqan keńeste el úshin mańyzdy máselelerdiń túıini tarqatylyp, júıeli usynystar, kesimdi sheshimder aıtyldy. Oqý-aǵartý mınıstri Ǵanı Beısembaev áleýmettik jelidegi paraqshasynda osyndaı pikir qaldyrdy.

«Memleket basshysy Qasym-Jomart Toqaev ulttyq biregeıligimizdi nyǵaıtyp, elimizdiń jańa qundylyqtaryn ornyqtyrýda úkimet pen qoǵam kúsh biriktirip jumys istesin dep tapsyrma berdi.

Ádiletti Qazaqstandy Adal azamattar ǵana qurady. Memleket basshysy Adal azamatqa tán qasıetter árbir jastyń boıynan tabylýǵa tıis dedi. Ulttyń jańa bolmysy bilim, ǵylym jáne mádenıet salasyn damytý arqyly qalyptasady. Osy baǵytta bizge orasan zor jaýapkershilik pen mindet júktelip otyr. ​«Tárbıe tal besikten bastalatynyn» eskere otyryp, óskeleń jas urpaqtyń boıyna adaldyq qaǵıdattaryn sińiremiz desek, eń aldymen oǵan ózimiz ónege kórseter tulǵa bolýymyz kerek.

Prezıdentimiz bizdiń ulttyq biregeıligimiz tabystylyqta ekenin aıtty. Bul el damýynyń mańyzdy strategııasyna aınalýǵa tıis. Ár bilim mekemesi óz aldyna «Biz qaıtkende tabysty balabaqsha, tabysty mektep, tabysty kolledj bola alamyz» degen maqsat qoıyp, oǵan jaýap berýge daıyn bolýy kerek.

Prezıdent «El atyn álemge tanytyp júrgen jastar ulttyń rýhyn jańǵyrtýda» dep atap kórsetti. Biz jastardyń boıyndaǵy óner-bilimge, ǵylymǵa, jańashyldyqqa degen osy serpilistiń qarqynyn saqtaı otyryp, ony kúsheıtýimiz, damytýymyz qajet. Memleket basshysy bilimdi damytý arqyly ulttyń jańa sapasyn qalyptastyrý kerek dep mindet júktedi, muny biz abyroımen atqarýymyz kerek.

Oqý-aǵartý salasynyń aldyna qoıylǵan taǵy bir aıqyn mindet – jastardy, onyń ishinde mektep oqýshylaryn jahandanýdyń qaterli yqpalynan qorǵaý. Memleket basshysy mektepte tárbıe jumysy aqsap turǵanyn synǵa aldy. Ásirese, oqýshylar arasyndaǵy býllıng máselesi týraly aıtyldy. Bul máselemen qoǵam bolyp kúresýimiz kerek. Bala tárbıesine mektep ujymymen qatar, ata-analar da, otbasy músheleri de jaýapty ekenin uǵyndyra otyryp, «Jumyla kótergen júk jeńil» demekshi, urpaq tárbıesine qoǵam belsendilerin, sarapshylardy da aralastyrýymyz kerek. Álbette, aldaǵy oqý jylynda qolǵa alynady dep josparlanyp otyrǵan mektep janyndaǵy «Ata-analar akademııasy» tikeleı osy máselemen de shuǵyldanady. Bul sharýa ózimniń jeke baqylaýymda bolady», - dedi mınıstr.