Ulttyq quryltaı quramy qalaı jasaqtalady

NUR-SULTAN. QazAqparat – QR Memlekettik keńesshisi Erlan Qarın Ulttyq quryltaı quramy qalaı jasaqtalatynyn aıtty, dep habarlaıdy QazAqparat tilshisi.

«Ulttyq quryltaı – el Prezıdenti janyndaǵy konsýltatıvtik-keńestik organ. Soǵan oraı onyń quramyna qatysty usynysty Memleket basshysynyń ákimshiligi daıyndaıdy. Jáne de Ulttyq quryltaıdyń otyrystaryna tek Ulttyq quryltaı músheleri ǵana qatysady. Ulttyq quryltaı jumysy qoǵamdyq bastamalar negizinde júzege asyrylatynyn atap ótken jón. Sonymen qatar quryltaı jumysyna qatysýshylardy aýystyryp otyrý prıntsıpi qarastyrylǵan. Bul aldaǵy ýaqytta kezeń-kezeńimen ózge de qoǵam belsendilerin tartýǵa múmkindik beredi», - dep jazdy Memlekettik keńesshi Telegram paraqshasynda.

Sonymen qatar ol arnaýly onlaın-platformanyń qurylǵanyn atap ótedi.

«Qazaqstan azamattary atalǵan platforma arqyly Ulttyq quryltaı hatshylyǵyna usynys jibere alady. Osylaısha, Ulttyq quryltaı jańarǵan Qazaqstan qurýǵa óz úlesin qosýǵa daıyn azamattardyń jalpyulttyq birigýiniń ózegine aınalady», - dedi Erlan Qarın.

Buǵan deıin Erlan Qarın Ulttyq quryltaıdyń ne úshin qurylǵanyn túsindirgen edi.