Ulttyq quryltaı: Qazaqstan tarıhynyń kóptomdyq jınaǵyna qatysty tapsyrma berildi

ASTANA. QazAqparat – Túrkistanda ótip jatqan Ulttyq quryltaıda Prezıdent Qasym-Jomart Toqaev Qazaqstan tarıhynyń kóptomdyǵy jeńil tilde jazylýy tıis ekenin aıtyp, tapsyrma berdi, dep habarlaıdy QazAqparat tilshisi.

«Qazaqstan aýmaǵynda ótken tarıhı oqıǵalardyń álemdik úderistermen tyǵyz baılanysta sıpattalýy mańyzdy. Bir sózben aıtsaq, jeti tomdyq eńbekte elimizdiń shynaıy shejiresi tolyǵymen jazylýy qajet. Kóptomdyqtyń tili – jeńil, mátini – kez kelgen jastaǵy oqyrmanǵa túsinikti bolýy kerek. Bul – asa mańyzdy másele. Qazaqstan tarıhynyń kóptomdyq jınaǵyn kelesi jyldyń ortasyna deıin ázirleýdi tapsyramyn. Sodan soń ol ǵylymı ortada keńinen talqylanýy kerek», - dep tapsyrma júktedi Prezıdent.

Memleket basyshysy bul eńbek ulttyń tarıhı sana-sezimin jańǵyrtýǵa, memlekettiligimizdi nyǵaıtýǵa zor úles qosady dep senip bildirdi.

«Biz san ǵasyrlyq tarıhymyzdy maqtan etemiz. Tamyry tereń tól shejiremiz – halqymyzdyń mádenı kodynyń ózegi. Ony jan-jaqty zerttep, oı eleginen ótkizýge jáne barynsha dáripteýge qajetti jaǵdaı jasaýymyz kerek. Bul – memlekettiń negizgi mindetiniń biri», - dedi Qasym-Jomart Toqaev.

Eske salaı keteıik, búgin Túrkistanda Memleket basshysynyń qatysýymen Ulttyq quryltaıdyń ekinshi otyrysy ótip jatyr.