Ulttyq quryltaı: Qasym-Jomart Toqaev mysalǵa keltirgen Martın Lıýter Kıng kim

ASTANA. QazAqparat – Túrkistanda ótken Ulttyq quryltaıdyń ekinshi otyrysynda sóz sóılegen Prezıdent Qasym-Jomart Toqaev óziniń armany jaıly aıta kele, AQSh-taǵy qara násildi azamattardyń quqyqtary úshin kúres basshylarynyń biri, amerıkalyq dinı ári qoǵam qaıratkeri Martın Lıýter Kıngti tilge tıek etti. Osy oraıda, QazAqparat tarıhı tulǵa týraly derekterdi nazarǵa usynady.

Martın Lıýter Kıng 1929 jyly Atlantada dúnıege kelgen. Onyń ata-anasy pastor bolǵan.

Ol eresek kezinde azamattyq quqyqtar úshin afroamerıkalyq qozǵalysty basqaryp, násildik kemsitýshilikke qatysty zańdardyń kúshin joıdy.

Kıng tarıhtaǵy eń beldi oratorlardyń biri sanaldy. Onyń áıgili «Meniń armanym bar» sózi qara jáne aq násildi adamdar teń quqyqqa ıe bolatyn keleshekke baǵyttalǵan.

Martın Lıýter Kıngtiń bastamasynan keıin, ıaǵnı 1964 jyly AQSh bıligi azamattyq quqyqtar týraly zań qabyldady. Onda qoǵamdyq oryndarda bólinýge tyıym salyndy. Al 1965 jyly qabyldanǵan daýys berý quqyǵy týraly zań afroamerıkalyqtardyń ózge násildermen teń dárejede ekenin túpkilikti aıqyndap berdi. 1964 jyly Martın Lıýter Kıng Nobel syılyǵyn aldy.

Quryltaıda sóz sóılegen Qasym-Jomart Toqaev Martın Lıýter Kıngtiń dál osy ataqty sózin mysalǵa ala otyryp, óziniń armany týraly aıtyp, Prezıdent kitaphanasyn ashý jóninde bastama kóterdi.

«Martın Lıýter Kıng sııaqty meniń de kókeıimde júrgen bir arman bar, bul – táýlik boıy jumys isteıtin Prezıdent kitaphanasyn ashý. Men mundaı kitaphanany Ankarada kórdim. Onyń oqyrmandary álemniń ár túkpirinde basylyp shyqqan kórkem shyǵarmalardy, arnaýly ádebıetti oqı alady. Mundaı kitaphanany elimizde de salýǵa bolady dep oılaımyn», - dedi Prezıdent.

Eske salaıyq, búgin Memleket basshynyń qatysýymen Túrkistanda Ulttyq quryltaıdyń ekinshi otyrysy ótti.