Ulttyq quryltaı ınstıtýtsıonaldy alańǵa aınalady - Saıasat Nurbek

NUR-SULTAN. QazAqparat – Ulttyq quryltaı bul negizgi ókilettik fýnktsııasyn júzege asyratyn ınstıtýtsıonaldy alańǵa aınalady. Bul týraly «Ulttyq quryltaı – qoǵamdyq dıalogtyń jańa modeli» atty «Sarap» eksperttik klýbynyń otyrysynda Májilis depýtaty Saıasat Nurbek málim etti, dep habarlaıdy QazAqparat tilshisi.

«Memleket basshysy óz Joldaýynda naqty usynystar jasady. Sońǵy 10 jylda saıası júıeniń sezgishtigin joǵaltyp aldyq. Ekinshiden, saıası júıeniń tepe-teńdiginen aıyryldyq. Sondyqtan halyqpen tikeleı jumys isteıtin, ıaǵnı máslıhattar men Parlament Májilisi ekeni túsinikti. Biraq bul fýnktsııa álsirep ketkennen keıin, onyń ornyna osyndaı birneshe organ jasaýǵa týra keldi. Bılik ony 10 jylda sezindi, biz halyqpen tikeleı baılanysty joǵaltyp jatyrmyz. Bul rette memlekettik organnyń janynan qoǵamdyq keńester paıda boldy. Prezıdent 2019 jyly kelgende osynyń bárin jaqsy túsindi, ıaǵnı «halyqtyń únin qalaı estımin» degen qaǵıdatqa ekpin qoıdy. Memlekettik organdar baıandamalar jazǵanda – bul málimetter birneshe súzgiden ótkiziledi. Osynyń bárin nazarǵa alyp, Ulttyq qoǵamdyq senim keńesi quryldy», - dedi S. Nurbek.

Osy oraıda ol Ulttyq keńes osy ýaqyt ishinde óziniń rólin atqara alǵanyn atap ótti.

«Úsh jyl boıy jumys istedik. Bizdiń sol kezdegi negizgi qyzmetimiz Prezıdentke túrli áleýmettik toptardyń únin taza jetkizý boldy. Sol jetkizilgen aqparattarǵa, halyqtyń kókeıinde júrgen suraqtar men talaptarǵa kerekti jaýap qaıtarý nazarǵa alyndy», - dedi depýtat.

«Endi Ulttyq quryltaı nelikten áli kúnge deıin qajet ? Joldaýda úsh másele aıtyldy. Birinshiden, quryltaı qoǵamdyq keri baılanystyń ınstıtýtsıonaldyq alańy bolady. Ol búkil qurylǵan qoǵamdyq keńesterdi biriktiretin, bir jerge jınaqtaıtyn birkelki bılikpen, Prezıdenpen halyqtyń arasyndaǵy baılanys. Ekinshiden, onyń quramyna depýtattar da, túrli salanyń ókilderi de kirýi kerek. Osy oraıda búkil Qazaqstannyń atynan sóıleı alatyn organ bolýy mańyzdy. Meniń oıymsha, bul ýaqytsha organ bolýy kerek. Sebebi, negizgi ınstıtýtsıonaldy ózgeris - ol zań shyǵarýshy ókiletti bıliktiń ózin qalpyna keltirý. Halyqtyń úni, halyqtyń ókileti, Konstıtýtsııamyz bekitken fýnktsııasy – ol máslıhattar, Májilis arqyly berilýi kerek. Biraq ony bir kúnde jasaı almaımyz. Áli de Konstıtýtsııanyń 30-dan astam babyna ózgeris engizý qajet jáne taǵy 20-dan astam zań qabyldaý kerek. Parlament Májilisiniń aldynda aýqymdy jumys tur. Osy ýaqytta Ulttyq quryltaı bul negizgi ókilettik fýnktsııasyn júzege asyratyn ınstıtýtsıonaldy alańǵa aınalmaq», - dedi Saıasat Nurbek.

Eske sala keteıik, bıyl naýryz aıyndaǵy Joldaýynda Memleket basshysy Qasym-Jomart Toqaev ulttyq quryltaı qurýdy usyndy.