Ulttyq quryltaı ıdeıalar usynatyn alań bolmaq – Erlan Qarın

NUR-SULTAN. QazAqparat – Ulttyq quryltaı qoǵamdy uıystyrý jolynda ıdeıalar usynatyn dıalog alańy bolmaq. Bul týraly Memlekettik keńesshi Erlan Qarın youtube kanalynda aıtty, dep habarlaıdy QazAqparat.

«Ulttyq quryltaı qoǵamdy odan ári uıystyrý jolynda ıdeıalar usynýǵa jáne ony júzege asyrýǵa baǵyttalǵan dıalog alańy bolmaq. Onyń quramynda 117 adam bar. Quryltaıǵa parlament depýtattary, saıası partııalardyń, qoǵamdyq keńesterdiń, kásipkerler, bilim, medıtsına, mádenıet, adam quqyqtaryn qorǵaý salasynyń ókilderi men belsendi jastar múshe boldy. Ulttyq quryltaıdyń basty ereksheligi – oǵan ár óńirdegi qoǵamdyq keńesterden bir ókil múshe bolyp kirdi. Osylaısha atalǵan dıalog alańy barlyq qoǵamdyq keńesterdiń túıini bolyp otyr», - dedi Memlekettik keńesshi.

Eske sala keteıik, Ulytaýda ótken quryltaıdyń alǵashqy otyrysynda Memleket basshysy Ulttyq quryltaıda halyqtyń úni shyn máninde estilýi tıis degen edi.