Ulttyq quramanyń fýtbolshysy M.Rojkov aýyr apatqa ushyrady
ASTANA. 19 jeltoqsan. QazAqparat - Fýtboldan Qazaqstan qurama komandasynyń qorǵaýshysy Mıhaıl Rojkov jol apatyna ushyrady, onyń kóligi taıǵanaq joldan shyǵyp ketip, dińgekke soǵyldy.
Jol-kólik apatynyń saldarynan «Astana» komandasynyń oıynshysy onyń sporttaǵy kásibine kedergi bolýy múmkin aýyr jaraqattar aldy. Bul týraly "Vremıa" gazetinde jaryq kórgen «Avarıınaıa sıtýatsııa» maqalasynda jazyldy.
Jol-kólik apaty Máskeýde oryn aldy. Ol bul ýaqytta Reseıde demalysta bolǵan. «Astananyń» 28 jastaǵy qorǵaýshysyna kómek qajet bolǵany jóninde Feısbýktegi paraqshasyna fýbol agenti Evgenıı Lovchev jazdy.
«Men Mıshamen birge jumys istemeımin», - dedi ol. - Bar bolǵany oǵan demeý bolyp, qıyn sátte kómek kórsetkim keledi. Biz oǵan qandaı kómek kerek dep suraǵanda, qan tapsyrý kerek dedi. Biz qazir qan tapsyrýǵa bara jatyrmyz.
Ótken maýsymda Rojkov óziniń klýbynda barlyq matchtardy aýysymsyz ótkizip, 6 gol saldy. Jambasynyń synýyna jáne ózge de jaraqattarǵa baılanysty ol óziniń komandasyna 2013 jyly kómektese alatyny ekitalaı.
«Biz oqıǵa jaıly bilgende eseńgirep qaldyq. Men óz basym Mıhaıldiń apattan keıin qaıta qalpyna kelip, aıaqqa turatynyna senemin. Biz onymen únemi baılanysta júremiz. Qazir ol basynan aýyr kezeńdi ótkerýde, klýb oǵan qajetti kómek kórsetip, qoldaý bildirýge daıyn. Komandanyń ujymy Mıhaılge tezirek jazylyp ketýin tileıdi. Rojkovtyń óz qalpyna kelip, «Astana» men Qazaqstannyń qurama komandasy úshin oınaıtynyna senemin, - dedi «Astana» komandasynyń prezıdenti Azamat Aıtqojın.
