Ulttyq qurama sportshylary Shymkentte jattyǵady
ASTANA. QazAqparat - Ońtústik Qazaqstan oblysynyń ákimi Janseıit Túımebaev Shymkent qalasy, «Tassaı» shaǵynaýdanynda ornalasqan «BIІK» sport kesheninde dzıýdodan áıelder jáne aýyr atletıkadan erler arasyndaǵy QR Ulttyq quramalarymen kezdesti, dep habarlaıdy óńirlik ákimdiktiń baspasóz qyzmeti.
«Ózderińizben Ońtústikte júzdeskenime qýanyshtymyn. Sizder Brazılııada ótken jazǵy Olımpıada oıyndarynda tamasha óner kórsettińizder. Osy oqý-jattyǵý jıynynda da kózge túsken oblysymyzdyń myqty-myqty sportshylary elimizdiń bas quramasyna enedi dep oılaımyn. Bizdiń óńirde zamanaýı úlgidegi bazalyq sport ortalyqtary az emes. «BIІK» sport kesheni solardyń biregeıi. Sondyqtan sizderdiń osy ortalyqta jattyǵyp, dúbirli dodalarǵa daıyndyq júrgizýlerińiz biz úshin úlken qýanysh. Baıraqty báskelerde qarsylastaryńyzdan árqashan básterińiz bıik bolsyn!»,- dedi óńir basshysy Ulttyq qurama múshelerin respýblıkalyq alǵashqy oqý-jattyǵý jıyndarynyń bastalýymen quttyqtap.
Sporttyq oqý-jattyǵý jıyny barysyndaǵy júzdesýde dzıýdodan áıelder arasynda QR Ulttyq qurama komandasynyń aǵa jattyqtyrýshysy M.Danaıbaev pen aýyr atletıkadan erler arasynda QR Ulttyq qurama komandasynyń aǵa jattyqtyrýshysy Alekseı Nı 2017 jyly ótetin halyqaralyq jarystar aldyndaǵy daıyndyq jumystary men josparlary týraly oılarymen bólisti.
«El sportynyń tarıhynda Ońtústik Qazaqstan oblysynyń orny erekshe. Osy óńirdiń týmasy aýyr atletıkadan áıelder arasynda tuńǵysh qazaq qyzy Jazıra Japparquldyń olımpıada oıyndarynda kúmis júlde oljalaýynyń ózi úlken maqtanysh. Bul óńirdegi sporttyń damýyna jergilikti bılik tarapynan kórsetilip jatqan qamqorlyq pen shynaıy janashyrlyqtyń arqasy», - dedi Alekseı Nı. 
Jıyn barysynda oblystyq Dene shynyqtyrý jáne sport basqarmasynyń basshysy Álibek Nurtaev bıyl respýblıkalyq jáne halyqaralyq jarystarǵa qatysatyn oblys sportshylarynyń daıyndyǵy týraly baıandady.
«BIІK» sport kesheniniń jumystarymen tanysqan Janseıit Qanseıituly Brızılııada ótken HHHІ Olımpıada oıyndarynyń aýyr atletıkadan áıelder arasyndaǵy kúmis júldegeri Jazıra Japparqul men deıýdo kúresinen áıelder arasyndaǵy qola júldegeri Galbadrah Otgontsegtsegti el Táýelsizdiginiń 25 jyldyǵy medalimen marapattady.
Aıta keteıik, Ońtústikte 4 oblystyq jáne 4 aýdandyq balalar men jasóspirimder sport mektepterindegi aýyr atletıka bólimderinde 41 bapker 600-ge jýyq balany jattyqtyrady. Sońǵy 25 jylda álemdik jarystarda, Azııa birinshilikterinde oblystyń 11 aýyr atleti top jarsa, onyń 6-aýy jazǵy Olımpıada oıyndaryna qatysqan. Al, oblystyq, qalalyq, aýdandyq deńgeıdegi 35 sport mektebiniń dzıýdo bólimderinde 150 jattyqtyrýshy 3 myńnan astam balany tárbıeleýde.
