Ulttyq qurama komandalardyń oqý-jattyǵý jıyndary toqtatylady
NUR-SULTAN. QazAqparat - Oqý-jattyǵý jıyndaryn uıymdastyrý jáne baqylaý úshin qurylǵan Qazaqstan Ulttyq Olımpıadalyq komıtetiniń jedel shtaby ulttyq quramalardyń oqý-jattyǵý jıyndaryn ótkizý men uıymdastyrýdyń ýaqytsha toqtatylatyny týraly resmı túrde málimdeıdi, dep habarlaıdy Olympic.kz.
1 shildeden bastap barlyq qurama komandalardyń oqý-jattyǵý jıyndary toqtatyldy. Mundaı sheshim Qazaqstanda koronavırýs indetiniń órshýine jáne kóptegen iri halyqaralyq jarystardyń keıinge shegerilýine baılanysty qabyldanǵan.
Sonymen birge, qazirgi tańda jattyǵý jıyndaryn ótkizip jatqan komandanyń barlyǵy toqtatylyp, budan keıin josparlanǵan jıyndar ótpeıtin bolady.
«Maýsym aıynda oqshaýlaný rejıminde birneshe qurama komanda oqý-jattyǵý jıyndaryn sátti ótkizdi. Sondaı-aq, taǵy birneshe komanda sanıtarlyq-dezınfektsııalyq talaptardy saqtaı otyryp sport nysandarynda jattyǵýyn jalǵastyrýda. Elimizde epıdemııalyq jaǵdaıdyń órship ketýine baılanysty, sonymen qatar, quzyrly mekemelermen aqyldasa kele jedel shtab toby quramalardyń jattyǵý jıyndaryn toqtatý týraly sheshim qabyldady. Biz jaǵdaıdy kúnde jiti qadaǵalap otyrmyz. Aıta keterligi, UOK úshin sportshylardyń densaýlyǵy árdaıym birinshi kezekte turady», deıdi jedel shtabtyń jetekshisi, sport dırektsııasynyń dırektory Elsııar Qanaǵatov.
1-29 maýsym aralyǵynda 12 sporttyq nysanda 26 oqý-jattyǵý jıyndary ótkizildi. Oǵan 22 ulttyq qurama komandasy qatysty. OJJ qaýipsizdik sharasy qatań saqtalǵan sport nysandarynda kezeń-kezeńimen ótti.
