Ulttyq qorǵanys ýnıversıtetiniń 100-den asa magıstranty QR QK men UQShU quramyn tolyqtyrady

ASTANA. QazAqparat - Astanada QR Qorǵanys mınıstri general-polkovnık Sáken Jasuzaqovtyń basshylyq etýimen Elbasy - Qazaqstan Respýblıkasynyń Tuńǵysh Prezıdenti atyndaǵy Ulttyq qorǵanys ýnıversıteti ofıtserleriniń saltanatty shyǵarylymy ótti, dep habarlaıdy Qorǵanys mınıstrliginiń baspasóz qyzmeti.

Baspasóz málimetterine qaraǵanda, 100-den asa magıstrant Qazaqstan Qarýly Kúshteriniń jáne UQShU qatysýshy memleketteriniń ofıtserler korpýsy qataryn tolyqtyrdy. Qazirgi ýaqytta Ulttyq qorǵanys ýnıversıteti UQShU múshe memleketteriniń Qarýly Kúshteri úshin áskerı kadrlardy birlesip daıyndaý jóninde oqý oryndarynyń tizbesine engizildi jáne búginde túlekter arasynda Armenııa Respýblıkasy, Qyrǵyz Respýblıkasy jáne Tájikstan Respýblıkasynyń ókilderi bar.

«Áskerı kadrlardy daıarlaý - erekshe memlekettik mańyzdy is. Sondyqtan Sizder, ıaǵnı, Ulttyq qorǵanys ýnıversıtetiniń túlekteri zaman talabyna saı, áskerı qyzmettiń barlyq salalarynda baǵyt-baǵdarlaryńyz bar úzdik maman atanýǵa tıissizder. Ýnıversıtet qabyrǵasynda ártúrli aýqymdaǵy operatsııalardy sátti josparlaýǵa, birlestikterdi, quramalar men áskerı bólimderdi myqty basqarýǵa múmkindik beretin tereń bilim aldyńyzdar», - dep atap ótti áskerı vedomstvo basshysy general-polkovnık Sáken Jasuzaqov.

Qazirgi ýaqytta Elbasy - QR Tuńǵysh Prezıdenti atyndaǵy Ulttyq qorǵanys ýnıversıteti Qazaqstannyń áskerı bilim berý isinde kóshbasshy bola otyryp, tyńdaýshylar men oqytýshylardyń utqyrlyǵyn, joǵary jáne joǵary oqý ornynan keıingi barlyq deńgeıler men dárejeler sabaqtastyǵyn qamtamasyz etý jóninde bilim baǵdarlamalaryn júzege asyrýda ozyq oqytý ádisterin qoldanady.