Ulttyq qorǵanys ýnıversıtetindegi Bilim kúni «QR Qarýly Kúshterdiń róli men orny» taqyrybyndaǵy dárispen bastaldy. VIDEO

ASTANA. 3 qyrkúıek. QazAqparat - Elimizdegi áskerı bilim ordalarynda jańa oqý jylynyń bastalýyna arnalǵan saltanatty is-sharalar bolyp ótti. Bul týraly QR Qorǵanys mınıstrliginiń baspasóz qyzmetinen habarlady.

Qorǵanys mınıstriniń birinshi orynbasary - Qazaqstan Respýblıkasy Qarýly Kúshteri Bas shtabynyń bastyǵy general-polkovnık Sáken Jasuzaqov áskerı bilimniń qara shańyraǵy Ulttyq qorǵanys ýnıversıtetinde boldy. Bas shtab bastyǵy tyńdaýshylar aldynda «Qazaqstan Respýblıkasynyń qaýipsizdik júıesindegi Qarýly Kúshterdiń róli men orny» taqyrybynda dáris oqydy.

General-polkovnık S. Jasuzaqov óz dárisinde Qarýly Kúshterdi qoldanýdyń negizgi baǵyttary, QR QK damýynyń negizgi baǵyttary jáne jaýyngerlik tapsyrmalardy sheshýdegi komandırlerdiń derbes sheshim qabyldaýy sııaqty máselelerge toqtalyp ótti.

«Áskerı mamandar - armııanyń bolashaǵy. Elbasy - Qarýly Kúshterdiń Joǵarǵy Bas qolbasshysy N.Á. Nazarbaevtyń qoıyp otyrǵan talaby boıynsha áskerimiz sany jaǵynan az, utqyr, joǵary kásiı, qazirgi zamanǵy qarý-jaraq pen áskerı tehnıkamen jaraqtanýy kerek. Qazir Qorǵanys mınıstrliginde kásibı armııaǵa kóshýdiń tujyrymdamasy jasaldy. Biz 2014 jyldan bastap Qarýly Kúshterdi negizi ofıtserlik jáne serjanttyq quramnan turatyn kásibı armııaǵa tolyqtaı kóshirýdi josparlap otyrmyz. Sondaı-aq, Qorǵanys mınıstrliginiń basshylyǵy ofıtserlerdiń jan-jaqty ıntelektýaldy bilim alýy úshin ǵylymı jáne bilim bazasyn quryp, damytýǵa barynsha mán berip otyr», - dep atap ótti QR QK Bas shtabynyń bastyǵy.