Ulttyq qorǵanys ýnıversıtetinde jańa fakýltet ashyldy
ASTANA. QazAqstan - Qazaqstan Respýblıkasynyń Tuńǵysh Prezıdenti - Elbasy atyndaǵy Ulttyq qorǵanys ýnıversıtetinde materıaldyq-tehnıkalyq qamtamasyz etý áskerleri fakýltetiniń saltanatty ashylý rásimi ótti. Bul týraly QR Qorǵanys mınıstrliginiń baspasóz qyzmeti habarlady.
Atalǵan fakýltet joǵary áskerı bilim júıesindegi keń beıindi materıaldyq-tehnıkalyq qamtamasyz etý mamandaryn daıyndaý jónindegi tapsyrmalardy sheshý úshin qurylǵan. Fakýltettiń ashylý saltanatyna Ulttyq qorǵanys ýnıversıteetiniń bastyǵy general-maıor Ashat Rysbaev, QR QK Tyl jáne qarý-jaraq bastyǵy basqarmasynyń shtab bastyǵy polkovnık Almaz Ahmadıev qatysty.
«Memlekettiń áskerı qýaty tek qazirgi zamanǵy joǵary tehnologııalyq qarý-jaraq pen áskerı tehnıka úlgileriniń sany men sapasyna negizdelmeıdi. Jaýyngerlik is-qımyldardy oryndaýǵa múmkindik beretin áskerlerdi materıaldyq-tehnıkalyq qamtamasyz etý de qajet. Osy salanyń mamandary ıgerýge tıisti biliktilik talaptary men kásibı quzirettiń mańyzdylyǵy bizdi daıarlyqtyń qazirgi zamanǵy jańa júıesin qurýǵa ıtermeleıdi. Osyǵan baılanysty materıaldyq-tehnıkalyq qamtamasyz etý mamandaryna qoıylar talap ta arta túspek», - dep atap ótti ýnıversıtet bastyǵy general-maıor Ashat Ryspaev.
Osy baǵyttaǵy biriktirilgen basqarý júıesiniń mamany tyldyq, tehnıkalyq, kóliktik jáne medıtsınalyq qamtamasyz etý sııaqty quramdas túrlerdiń negizin bilýi qajet ekenin atap ótken jón.
