Ulttyq qorǵanys ýnıversıtetinde soǵystar tarıhy jáne áskerı óner kafedrasy ashyldy
«Bul kafedra elimizdegi áskerı tarıhshy kadrlardy daıarlaıtyn birden-bir kafedra bolǵandyqtan onyń ashylýy Qazaqstan Respýblıkasynyń áskerı bilimi men áskerı ǵylymy úshin mańyzdy oqıǵa sanalyp otyr. QR áskerı tarıhy tutas alǵanda áskerı ǵylym otandyq ǵylymnyń damyp kele jatqan salasy. Atalǵan kafedranyń mańyzy onyń aldyna qoıylǵan mindetterge baılanysty arta túsetin bolady. Kafedra PhD doktarantýrasynda «Áskerı tarıh» mamandyǵy boıynsha kadrlar daıarlaıtyn bolady, bul oqý baǵdarlamasyn keńeıtý men tereńdetýdi kózdeıdi», - delingen QR Qorǵanys mınıstrligi málimetinde.
Ulttyq qorǵanys ýnıversıtetin damytý tujyrymdamasynda «Qazaq jáne orys tilderinde oqytylatyn áskerı tarıh» mamandyǵy boıynsha magıstratýraǵa irikteý josparlanǵan. Osyndaı oqý baǵdarlamasynyń ázirlenýi 2 jyl ishinde tutas joǵary tarıhı jáne joǵary áskerı bilimi bar maman qalyptastyrýy tıis.
Kafedra soǵys ardagerlerimen kezdesýler ótkizip, áskerı-tarıhı murajaılar men memorıaldarǵa ekskýrsııalar jasaıdy. Kafedranyń professorlyq-oqytýshylyq quramy bolashaqta jekelegen taqyryptar boıynsha sabaqtar ótkizý úshin kórnekti ǵylym, mádenıet jáne óner qaıratkerlerin shaqyratyn bolady. Sonymen qatar aldyńǵy qatarly oqý oryndarynyń tarıh fakýltetterimen, QR ǵylymı jáne muraǵattyq mekemelerimen baılanysty damytýǵa úlken kóńil bóledi.
Qazirdiń ózinde tarıh páni boıynsha sabaqtar magıstranttarmen, doktoranttarmen, daıarlyq kýrsynyń tyńdaýshylarymen júrgizilip otyrǵanyn atap ótken jón.