Ulttyq qorǵanys ýnıversıtetinde kásibı biliktilikti arttyrý kýrstary ashyldy

ASTANA. QazAqparat - Qazaqstan Respýblıkasynyń Tuńǵysh Prezıdenti - Elbasy atyndaǵy Ulttyq qorǵanys ýnıversıtetiniń bazasynda quqyq qorǵaý organdary basshylarynyń Prezıdenttik rezervte turǵan qyzmetkerlerge arnalǵan kásibı deńgeıdi arttyrý kýrstarynyń ashylýy ótti, dep habarlaıdy QR QM baspasóz qyzmeti.

Kýrstyń ashylýyna Prezıdenttiń kómekshisi - Qazaqstan Respýblıkasy Qaýipsizdik Keńesiniń hatshysy general-leıtenant Vladımır Jumaqanov, QR Bas prokýrory Jaqyp Asanov, QR Qorǵanys mınıstriniń orynbasary general-leıtenant Talǵat Muhtarov, QR Bas prokýratýrasy janyndaǵy Quqyq qorǵaý organdary akademııasy rektorynyń mindetin atqarýshy Naıl Ahmetzákirov qatysty.

Kýrs baǵdarlamasynyń taqyrybyna sáıkes Ulttyq qorǵanys ýnıversıtetiniń «Qarýly Kúshteri Bas shtabynyń akademııasy» fakýltetiniń oqytýshylary zamanaýı áskerı qaqtyǵystardyń, álemdegi geosaıası jaǵdaıdyń sıpatyn zerdeleý jáne ózge de taqyryptar boıynsha sabaqtar ótkizedi.

Ýnıversıtette udaıy negizde QR QK, basqa da áskerleri men áskerı quralymdary áskerı qyzmetshileriniń biliktiligin josparly túrde arttyrý júzege asyrylady. Jyl saıyn QR QM Ulttyq qorǵanys ýnıversıteti bazasynda 1000 adamǵa deıin biliktilikti arttyrýdan ótedi.