Ulttyq qorǵanys ýnıversıtetinde Irannyń áskerı óner aýdıtorııasy ashyldy

NUR-SULTAN. QazAqparat – Aýdıtorııanyń saltanatty ashylý rásimi Iran Islam Respýblıkasy Joǵary Ulttyq qorǵanys ýnıversıteti delegatsııasynyń Ulttyq qorǵanys ýnıversıtetine sapary aıasynda ótti, dep habarlaıdy QazAqparat QR Qorǵanys mınıstrligine silteme jasap.

Resmı rásimge Iran Islam Respýblıkasynyń Qazaqstandaǵy Tótenshe jáne Ókiletti Elshisi Samadzade Saber Madjıd, áskerı-dıplomatııalyq korpýstyń dýaıeni polkovnık Son Tegýk, Ulttyq qorǵanys ýnıversıtetiniń basqarýshy jáne professorlyq-oqytýshylyq quramy qatysty.

Delegatsııanyń sapary barysynda joǵary oqý oryndary arasyndaǵy yntymaqtastyq, professor-oqytýshylar quramyn, ǵylymı qyzmetkerlerdi oqytý jáne olardyń biliktiligin arttyrý, eńbekterdi ózara jarııalaý jáne basqa da máseleler talqylandy.